शिक्षा ऐनका लागि भोलिदेखि काठमाडौँमा तीन लाख शिक्षक कर्मचारी उतार्दै महासंघ

काठमाडौँ- नेपाल शिक्षक महासंघ राष्ट्रिय समितिले काठमाडौँ भोलिदेखि शिक्षा ऐनका लागि अनिश्चितकालीन आन्दोलन गर्ने भएको छ। प्रतिनिधिसभाको शिक्षा, स्वास्थ्य तथा सूचना प्रविधि समितिमा विचाराधीन विद्यालय शिक्षा विधेयक–२०८० लाई संसद्बाट पारित गरी अविलम्ब ऐनको रुप दिनुपर्ने एक सूत्रीय माग राखेर महासंघले काठमाडौँमा अनिश्चितकालीन आन्दोलन गर्न लागेको हो।

काठमाडौँमा आज आयोजित पत्रकार सम्मेलनमा महासंघका अध्यक्ष लक्ष्मीकिशोर सुवेदीले महासंघ र सरकारबीच विगतमा भएका सबै सहमति सम्बोधन हुने गरी गुणस्तरीय विद्यालय शिक्षा, विद्यार्थी र शिक्षक–कर्मचारीमैत्री अग्रगामी विद्यालय शिक्षा ऐन जारी गराउन राज्यपक्षलाई बाध्य पार्नु आन्दोलनको उद्देश्य भएको बताए।

महासंघ गत माघ २० गतेबाट आन्दोलित छ। भोलिदेखि काठमाडौँमा हुन लागेको आन्दोलन दोस्रो चरणअन्तर्गतको आन्दोलन हो। ‘काठमाडौँ जाऔं’ अभियान चलाउँदै आएको महासंघले आन्दोलनमा झन्डै तीन लाख शिक्षक–कर्मचारी उपस्थित हुने महासंघको भनाइ छ।

महासंघको प्रेस विज्ञप्तिमा भनिएको छ,‘देशभरका सबै शिक्षक–कर्मचारीको सहभागितामा अनिश्चितकालीन शैक्षिक सडक आन्दोलन अघि बढाइन्छ। स्थायी, राहत, साविक उमावि, सिकाइ अनुदान, बालविकास कक्षा, अस्थायी करार, प्राविधिक धार, विशेष शिक्षा तथा संस्थागत विद्यालय लगायत सबै प्रकृतिका शिक्षक तथा विद्यालय कर्मचारीका सबै समस्या समाधान गरी गुणस्तरीय विद्यालय शिक्षाको प्रबन्धका पक्षमा स्पष्ट मार्ग निर्माण गर्न सक्ने नयाँ विद्यालय शिक्षा ऐन जारी नभएसम्म यो आन्दोलन निरन्तर चलिरहनेछ।’

आन्दोलन शान्तिपूर्ण, अनुशासित र मर्यादित हुने बताइएको छ। महासंघले शिक्षक–कर्मचारीलाई आचारसंहिता उल्लंघन नगर्न पनि अनुरोध गरेको छ।