प्रधानमन्त्री ओली बिमस्टेकमा भाग लिन थाइल्याण्ड प्रस्थान [तस्बिरहरू]

काठमाडौँ- प्रधानमन्त्री केपी शर्मा ओली बिमस्टेक शिखर सम्मेलनमा भाग लिन आज थाइल्याण्ड प्रस्थान गरेका छन्। उनलाई त्रिभुवन अन्तर्राष्ट्रिय विमानस्थलमा बिदाइ गरिएको छ।

प्रधानमन्त्री ओलीले अप्रिल २ मा थाइल्याण्डका प्रधानमन्त्री पाइतोनगतार्न सिनावात्रासँग द्विपक्षीय भेटवार्ता गर्ने तथा केही समझदारीमा हस्ताक्षर गर्ने कार्यक्रम रहेको छ। उनले अप्रिल ४ मा बिमस्टेक सम्मेलनलाई सम्बोधन गर्नेछन्।

बिमस्टेकको छैटौँ शिखर सम्मेलन थाइल्याण्डको राजधानी बैंककमा अप्रिल ३ देखि सुरु हुँदैछ। सम्मेलनअन्तर्गत अप्रिल २ मा बिमस्टेक सदस्य राष्ट्रका उच्च अधिकारीहरूको बैठक बस्नेछ भने अप्रिल ३ मा विदेशमन्त्रीस्तरीय बैठक हुनेछ।

थाइल्याण्डले बिमस्टेकको अध्यक्षका रूपमा ‘बिमस्टेक बैंकक भिजन-२०३०’ प्रस्तुत गरेको छ। थाइल्याण्ड सरकारको जनसम्पर्क विभागका अनुसार व्यापार, लगानी, दिगो विकास प्रवर्द्धन गर्दै गरिबी निवारण र क्षेत्रीय सहयोगलाई सशक्त बनाउने लक्ष्य लिइएको छ। साथै, कृषि, पशुपालन, मत्स्यपालनमा उत्पादकत्व वृद्धिसहित स्वास्थ्य संकटको तयारीलाई प्राथमिकता दिइनेछ।

दिगो पर्यटन प्रवर्द्धनका लागि बहु–सरोकारवाला दृष्टिकोण अपनाइने बताइएको छ। यो समिटले सदस्य राष्ट्रहरूबीच साझा सुरक्षा र विकास चुनौतीहरूलाई सम्बोधन गर्न सहकार्य प्रवर्द्धन गर्ने लक्ष्य राखेको छ।

तस्बिरहरू रासस