हिमाल प्रेस 
वनमा डढेलो। प्रतिनिधिमूलक तस्बिर।
पाँचथर- वनमा लागेको डढेलोमा परी एक जनाको मृत्यु भएको छ भने चार जना घाइते भएका छन्। कुम्मायक गाउँपालिका–३ ताम्राखुमा वनमा लागेको डढेलोमा परी बिहीबार सोही वडाको हात्तीपोखरीकी २६ वर्षीया प्रतिमा सम्बाहाम्फेको मृत्यु भएको हो।
बिहीबार प्रतिमासँगै २८ वर्षीया सपना सम्बाहाम्फे, ११ वर्षीया शिवाना सम्बाहाम्फे र ६० वर्षीया निरमाया सम्बाहाम्फे घाँस काट्न वन गएका थिए। आगलागीबाट जोगिन भाग्ने क्रममा उनीहरू डढेलोमा परेको जिल्ला प्रहरी कार्यालयका प्रहरी निरीक्षक विनालाल साहले जानकारी दिए।
घाइते चारै जनालाई उपचारका लागि बिपी कोइराला स्वास्थ्य विज्ञान प्रतिष्ठान धरान लगिएको थियो। प्रतिमाको गए राति बाटोमै मृत्यु भएको प्रहरीले जनाएको छ। अन्य तीन जनाको धरानमा उपचार भइरहेको छ।
उक्त वनमा लागेको आगो अझैसम्म नियन्त्रण नआएको कुम्मायक–३ का वडाध्यक्ष बाबुराम कार्कीले जानकारी दिए। हावाहुरी चल्नासाथ डढेलो वस्तीमा पस्ने खतरा रहेको उनको भनाइ छ। आगो निभाउन गएका स्थानीय खगेन्द्र विक लडेर घाइते भएका छन्।
यस्तै, फिदिम नगरपालिका–१३ जैवारीस्थित रानीवन सामुदायिक वनमा लागेको डढेलोमा परेर फिदिम–१४ की ४७ वर्षीया उषा नेम्बाङ राई घाइते भएकी छिन्। दाउरा बोकेर आउने क्रममा उनी डढेलोमा परेकी जिल्ला प्रहरी कार्यालयले जनाएको छ। उनको धरानमा उपचार भइरहेको छ।
