सिस्नेरी खोलामा डुबेर दाजुभाइसहित तीन बालकको ज्यान गयो

काठमाडौँ- मकवानपुरको उत्तरी क्षेत्रमा पर्ने इन्द्रसरोवर गाउँपालिका–३ स्थित सिस्नेरी खोलामा डुबेर ३ बालकको मृत्यु भएको छ।

काभ्रे घर भई सिस्नेरी मामाघर आएका २ बालक र सिस्नेरी डोडारेका एकजना बालकको सिस्नेरी बजारपछाडि खोलामा पौडी खेल्ने क्रममा सोमबार अपराह्न करिब साढे ४ बजे डुबेर मृत्यु भएको घटनास्थलबाट इलाका प्रहरी कार्यालय भीमफेदी प्रमुख प्रहरी निरीक्षक ललिता ढकालले जानकारी दिइन्।

इन्द्रसरोवर–३ सिस्नेरी डोडारेका श्यामबहादुर आचार्यका छोरा १४ वर्षीय सुशान्त आचार्य, काभ्रेको फूलबारी दाप्चा घर भएका १४ वर्षीय प्रमेश घोरासैनी र ११ वर्षीय प्रमाध घोरासैनीको डुबेर मृत्यु भएको हो।  घोरासैनी दाजुभाइ हुन् भने आचार्य मामाका छोरा हुन्।

उनीहरू सिस्नेरी खोलाको ढुंगाको ओढारमा जमेको पानीमा घरबाट पौडी खेल्न भनेर गएको प्रहरी निरीक्षक ढकालले बताइन्। गत असोजमा कुलेखानी जलाशयको ड्यामको ढोका खोलेर पानी छोड्दा सिस्नेरी खोलामा आएको बाढीले ढुंगाको ओढारमा दह बनेको थियो। बिदामा मामाघर आएका घोरासैनी दाजुभाइको मामाको छोरासँगै मृत्यु भएको स्थानीयलाई उधृत गर्दै ढकालले बताइन्।