हिमाल प्रेस 
काठमाडौँ- नेपाल पत्रकार महासंघको टोलीले गृहमन्त्री रमेश लेखकलाई तीनकुने घटनाको छानबिन गरी दोषीलाई कारबाही गर्न माग गर्दै ध्यानाकर्षण पत्र बुझाएको छ।
ध्यानाकर्षण पत्र ग्रहण गर्दै गृहमन्त्री लेखकले उक्त घटना अराजक र आपराधिक समूहद्वारा गरिएको भन्दै सरकार यस विषयमा गम्भीर रहेको बताए। ‘तिनकुनेको भीड कुनै निश्चित विचार वा सिद्धान्त नभएको हिंसात्मक झुण्ड थियो, जसको मार सञ्चारकर्मीले बेहोर्नुपर्यो,’ उनले भने।
सञ्चारमाध्यम र पत्रकारलाई निशाना बनाइएको घटनाको सत्यतथ्य छानबिन गरी दोषीमाथि कानुनी कारबाही गरिने उनले आश्वासन दिए। साथै, ज्यान गुमाएका पत्रकार सुरेश रजक र घाइते पत्रकारहरूको विषयमा सरकार संवेदनशील रहेको उनले बताए।
प्रकाशित: १८ चैत २०८१ १७:२०
प्रतिक्रिया
