शिक्षक महासंघलाई संसदीय उपसमितिले भन्यो- माग पूरा गर्न प्रतिबद्ध छौं, आन्दोलन स्थगित होस्

काठमाडौँ- शिक्षा, स्वास्थ्य तथा सूचना प्रविधि समितिअन्तर्गत गठित विद्यालय शिक्षा विधेयक–२०८० सम्बन्धी उपसमितिका संयोजक एवं नेकपा एमाले सांसद छविलाल विश्वकर्माले नेपाल शिक्षक महासंघ राष्ट्रिय समितिलाई आन्दोलन स्थगित गर्न आग्रह गरेका छन्। अविलम्ब विद्यालय शिक्षा ऐन जारी हुनुपर्ने माग गर्दै महासंघ गत माघ २० गतेदेखि आन्दोलित छ।

महासंघले आगामी बुधबारदेखि काठमाडौँमा लाखौं शिक्षक-विद्यालय कर्मचारी उतार्दै छ। सिंहदरबारमा सोमबार बसेको उपसमिति बैठकमा संयोजक विश्वकर्माले महासंघले राखेका मागहरूको सम्बोधन गर्न आफूहरू गम्भीर रहेको बताए। विद्यालय शिक्षा विधेयक पारित गर्नका लागि महासंघले गरेको संघर्षमा आफूहरू सकारात्मक रहेको र माग सम्बोधन गरेर अघि बढ्न प्रतिबद्ध रहेको उनले बताए।

प्रत्यक्ष र परोक्ष ढंगबाट सुझाव दिएर सघाउन आग्रह गर्दै उनले संघर्षको कार्यक्रम स्थगन गरी काममा फर्कन आग्रह गरे। संयोजक विश्वकर्माले समितिको ११३ वटा बैठकमा ३३ वटा बैठक विद्यालय शिक्षा विधेयकमा मात्रै केन्द्रित भएर बसेको बताए।

 बैठकमा उपस्थित सांसदहरूले अबको शिक्षालाई आत्मनिर्भर र सीपमूलक हुनेगरी विद्यालय शिक्षा विधेयक आउनुपर्नेमा जोड दिएका छन्। स्वार्थ समूहको हातमा जान नदिई राष्ट्रिय स्वार्थलाई ध्यान दिएर विद्यालय शिक्षा विधेयक बनाइनुपर्नेमा सांसदहरू जोड दिए।

बैठकमा बोल्दै शिक्षा, स्वास्थ्य तथा सूचना प्रविधि समिति सभापति अम्मरबहादुर थापाले विद्यालय शिक्षा विधेयक धेरै महत्वपूर्ण विधेयक भएको बताउँदै शिक्षालाई सुधार नगरेसम्म देशलाई सुधार्न नसकिने बताए।

समितिको बैठकमा नेकपा माओवादी केन्द्रकी सांसद रेखा शर्माले विद्यालय शिक्षा बनाउने कुरा चानचुने विषय नरहेको बताइन्। उनले विद्यालय शिक्षा विधेयक महत्त्वपूर्ण विधेयक भएकाले रिसोर्समा समस्या देखाएर राम्रो गराउनबाट रोकिनु नहुने बताइन्।

शिक्षा विधेयकका पेचिला विषय छिटो टुंग्याउनु पर्छ : शिक्षामन्त्री भट्टराई