हिमाल प्रेस 
काठमाडौँ– विभिन्न राजनीतिक दलका प्रमुख सचेतकहरूले विद्यालय शिक्षा विधेयक छिटो पारित गर्न सम्बन्धित समितिसमक्ष दबाब दिएका छन्।
शिक्षा, विज्ञान तथा प्रविधिमन्त्री विद्या भट्टराई र प्रतिनिधिसभाको शिक्षा, स्वास्थ्य तथा सूचना प्रविधि समितिका सभापति अम्मरबहादुर थापासहितको छलफलका क्रममा प्रमुख दलका प्रमुख सचेतकले यस्तो आग्रह गरेका हुन्।
उनीहरूले विधेयक पारित प्रक्रियामा आफ्नो दलको पूर्ण सहयोग रहने प्रतिबद्धतासमेत व्यक्त गरेका छन्। त्यस अवसरमा मन्त्री भट्टराईले सो विधेयक शीघ्र टुंगोमा पुर्याउन उपसमितिमार्फत काम भइरहेको उल्लेख गर्दै सहयोगका लागि सबै दलसँग आग्रह गरेकी छन्।
बैठकमा शिक्षक आन्दोलनका विषयमा समेत छलफल भएको थियो। सहभागी प्रमुख सचेतकहरुले शिक्षकहरूसँग यसअघि सरकारले गरेका सम्झौताहरूलाई विधेयकमा सम्बोधन गर्न सुझाव दिएका थिए।
विद्यालय शिक्षा विधेयक, २०८० का सम्बन्धमा शिक्षा, स्वास्थ्य तथा सूचना प्रविधि समितिमा दफावार छलफल भइरहेको छ। समितिका सभापति थापाले यस विषयमा थप छलफल गरी विधेयकलाई अन्तिम रूप दिने प्रक्रिया अघि बढाउने जानकारी दिए।
छलफलमा नेपाल कम्युनिस्ट पार्टी (एमाले) का मुख्य सचेतक महेश बर्तौला, नेपाली कांग्रेसका प्रमुख सचेतक श्यामकुमार घिमिरे, नेपाल कम्युनिस्ट पार्टी (माओवादी केन्द्र) का प्रमुख सचेतक हितराज पाण्डे र राष्ट्रिय स्वतन्त्र पार्टी (रास्वपा) का प्रमुख सचेतक सन्तोष परियारलगायत सहभागी थिए।
