हिमाल प्रेस 
नयाँ बानेश्वरस्थित संघीय संसद् भवनमा बुधबार बसेको प्रतिनिधिसभा बैठकमा धारणा राख्दै रास्वपा सांसद सुमना श्रेष्ठ। तस्बिर : रासस
काठमाडौँ- नेकपा माओवादी केन्द्रका सांसद माधव सापकोटाले २५ करोड बराबरको अवैध विदेशी मुद्रा बरामदका घटनामा विशेष छानविन गर्न माग गरेको छ।
बुधबार प्रतिनिधिसभा बैठकमा सांसद सापकोटाले अहिलेसम्मकै सबैभन्दा ठूलो अवैध रकम बरामद भएको घटनाले सिंगो देश तरंगित भएको भन्दै विशेष प्रकारको छानबिन समिति गठन गरेर अनुसन्धान गर्न माग गरे।
यस्ता प्रकृतिका घटनामा ड्राइभर र भरियामात्र पक्राउ गर्ने र मुद्दा नै हराएर जाने देखिएको भन्दै विशेष प्रकारको छानविन समिति गठन गर्नुपर्ने उनले बताए। उनले ठूलो मात्राको तस्करीको घटना उपल्लो तहको कनेक्सन नभइ सम्भव नरहेको जिकिर गरे।
कांग्रेस सांसद रामहरि खतिवडाले पनि २५ करोड बराबरको अवैध विदेशी मुद्रा बरामद प्रकरणमा मुख्य दोषीसम्म पुग्ने गरि अनुसन्धान गर्न माग गरे। उनले विभिन्न प्रकरणमा ड्राइभर र भरिया पक्रने र मालिकसम्म नपुग्ने प्रवृति देखिएको भन्दै मुख्य नाइकसम्म पुगेर कारवाही गर्नुपर्नेमा जोड दिए।
सांसद रोशन कार्कीले टोखामा ठूलो मात्रामा अवैध विदेशी मुद्रा बरामद भएको भन्दै नेपाल तस्करहरुको ट्रान्जिट प्वाइन्ट बनेको हो भन्दै प्रश्न गरे।
भ्रष्टाचारमा नेपालले नयाँ नयाँ कीर्तिमान कायम गरेको उहाले बताए। उनले जनताको सहनशिलतामा धरै परिक्षा लिइराखे सरकारलाई अप्ठेरो पर्ने चेतावनी दिए। मंगलबार प्रहरीले काठमाडौँको टोखाबाट करिब २५ करोड बराबरको विदेशी मुद्रासहित एक व्यक्तिलाई पक्राउ गरेको थियो।
