हिमाल प्रेस 
काठमाडौँ- विराटनगर उपमहानगरपालिकाकी उपमेयर शिल्पा कार्की नेकपा एमालेको जिल्ला उपसचिवमै हार व्यहोरेकी छन्। उनले उपसचिव पदमा ४०५ मत ल्याउँदा उनीसँग विजयी उम्मेदवार उषा झाले ४१८ मत पाइन्। उपमेयर शिल्पा केपी शर्मा ओली गुटबाट उम्मेदवार दिएकी थिइन्।
ओलीको गुट नै मोरङमा पराजित भयो। उनलाई हराउने झा भने जिल्ला समन्वय समिति मोरङकी उपप्रमुख हुन्। मोरङको अध्यक्षमा अजम्बर राई निर्वाचित भएका छन्। उनले प्रतिस्पर्धी संस्थापन पक्षका राजकुमार ओझालाई ३९ मतान्तरले पराजित गरे।
राईले ४४६ मत प्राप्त गर्दा ओझाले ४०७ प्राप्त गरे। उपाध्यक्षमा सागर थापाले ४ सय २२ मत ल्याएर निर्वाचित भए। उनका प्रतिस्पर्धी शान्ति लिम्बू भुजेलले ३९१ मत प्राप्त गरिन्। उनी गएको स्थानीय तहको निर्वाचनमा विराटनगरको मेयरको उम्मेदवार बनेका थिए।
उनलाई कांग्रेसका नागेश कोइरालाले जिते। पछिल्लो समय सागर एमालेसँग रुष्ट थिए। विभिन्न समयमा अन्तर्घात लागेको आरोप लाग्दा सागर कारबाहीमा समेत परेका थिए। यसले गर्दा उनी संस्थापन इतरसमूहबाट चुनाव लड्न बाध्य भए।
त्यस्तै, सचिवमा सोमराज थापा निर्वाचित भए। थापाले ४६१ मत प्राप्त गर्दा प्रतिस्पर्धी रविन थापाले ३ सय ६८ मत प्राप्त गरे।
उपसचिवमा सन्तोष वान्तवाले ४९० मत प्राप्त गर्दै निर्वाचित भए। प्रतिस्पर्धी ईर्जालाल राजवंशीले ३ सय ११ मत मात्रै प्राप्त गरे।
अधिवेशनमा ८ सय ८८ मत खसेको थियो। ९ सय ११ जना प्रतिनिधिमध्ये २३ जना अनुपस्थित भएका थिए। एमाले मोरङको अधिवेशन फागुन १७ गतेदेखि विराटनगरमा सुरु भएको थियो।
