हिमाल प्रेस 
तस्बिर क्यान
काठमाडौँ– युगान्डामा सञ्चालन हुने चार देशीय महिला टी–२० शृंखलाअन्तर्गत आफनो पहिलो खेल नेपाली महिला क्रिकेट टोलीले नामिबियासँग खेल्ने भएको छ।
युगान्डाको एन्टेब्बे क्रिकेट ओभल मैदानमा शनिबार हुने खेल नेपाली समयअनुसार अपराह्न ४ः४५ बजे हुनेछ। नेपालले नामिबियाको महिला टोलीसँग पहिलो पटक खेल्न लागेको हो। शृंखलामा नेपालसहित घरेलु टोली युगान्डा, नामिबिया र हङकङको सहभागिता रहेको छ।
सिरिजमा सबै टोलीले एकअर्कासँग सामान दुई/दुई खेल खेल्नेछन्। त्यसमा नेपालले यही फागुन २५ गते युगान्डासँग खेल्नेछ भने फागुन २६ गते हङकङसँग खेल्ने छ।
त्यसैगरी फागुन २८ गते नामिबियासँग, २९ गते युगान्डासँग र ३० गते हङकङसँग खेल्नेछ। लिग चरणको खेलमा शीर्ष दुई स्थानमा रहने टोलीले प्रतियोगिताको फाइनल खेल्नेछन्।
नेपाली टोलीमा कप्तान इन्दु बर्मासहित रुबिना क्षेत्री, पूजा महतो, अलिशाकुमारी यादव, साना प्रवीन, रोमा थापा, विन्दु रावल, सम्झना खड्का, ममता चौधरी, कविता जोशी, रिया शर्मा, राजमती ऐरी, रचना चौधरी र ईश्वरी विष्ट छ्न्।
नेपाली टोलिका प्रशिक्षक मनोज कटुवालले आफ्ना टोलीको कमजोरी सुधार गरी सिरिज जितेर फर्कने युगान्डा जानुअघि बताएका थिए। त्यस्तै, नेपाली टिमकी कप्तान बर्माले आफ्नो टोलीको तयारी राम्रो भएकाले शृंखलामा राम्रो खेल खेलेर फर्कने बताए।
