हिमाल प्रेस 
फाइल तस्बिर
काठमाडौँ- नागरिक उन्मुक्ति पार्टी (नाउपा)ले पछिल्लो समय जनमत पार्टीसँग एकता गर्ने तयारी भइरहेको छ। नाउपाका संरक्षक रेशम चौधरी र जनमत अध्यक्ष सीकेबीच एकता गर्ने कुरा अघि बढेको छ।
नेताहरूका अनुसार जनमत पार्टी र नाउपाबीच एकीकरणको तयारी अन्तिम चरणमा पुगेको छ। एकीकरणका लागि जनमत पार्टीका अध्यक्ष राउत र नाउपाका संरक्षक चौधरीबीच पटकपटक बैठक र छलफल भइसकेका छन्।
सबै छलफल सकारात्मक भएकाले चाँडै एकता घोषणा हुने उनीहरूले बताएका छन्। एकता चलिरहेकै बेला नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले नागरिक उन्मुक्ति पार्टीलाई माओवादीमा समाहित हुन आह्वान गरेका छन्।
नाउपालाई माओवादीमा समाहित हुन प्रचण्डले आह्वान गरेका हुन्। उनले रेशम चौधरीलाई आफू प्रधानमन्त्री भएका बेला रिहा गर्ने निर्णयमा पुगेको पनि बताए।
‘नाउपा माओवादीमा समाहित हुनुस् र विगतमा माओवादीमा रहेर हाल अन्य दलमा पुगेका थारू अगुवाहरूलाई पनि मूल घरमै फर्केर थारू अधिकार थप स्थापित गर्ने आन्दोलनमा सहभागी हुनुहोस्,’ मंगलबार कैलालीको टीकापुरमा थारू राष्ट्रिय मुक्ति मोर्चा नेपालको चौथोँ राष्ट्रिय सम्मेलनको उद्घाटन गर्दै प्रचण्डले भने।
माओवादीको नेतृत्व र लाखौं जनताको रगत पसिनाबाट प्राप्त राजनीतिक अधिकारको रक्षा, प्रयोग र विकास गर्ने जिम्मेवारी पनि माओवादीकै भएको उनले बताए।
