हिमाल प्रेस 
काठमाडौँ- कोशी विचार उत्सवमा नेपाल समाजवादी पार्टी (नयाँ शक्ति) की उपाध्यक्ष तथा युवा नेतृ मानुषी यमि भट्टराईले राजनीतिमा पैसा र पहुँचको प्रभावलाई राेक्न कानुनी रूपमा सुधार आवश्यक रहेको बताएकी छिन्।
उनले कर्णाली, कोशी र मधेशमा गरिएको सर्वेक्षणको आधारमा पैसाको प्रभाव केवल महिला र सिमान्तकृत समुदायमा मात्र सीमित नभई आम रूपमा लोकतन्त्रलाई दूषित पार्ने तत्वको रूपमा रहेको उल्लेख गरिन्।
‘राजनीतिमा वर्षौंदेखि योगदान दिएका पुरुष नेताहरूलाई पनि पैसा नभए वा कुनै निश्चित गुटमा नपरेमा चुनावी टिकट पाइँदैन। यस्तो अवस्थालाई सुधार्न निश्चित मापदण्ड तय गरिनुपर्छ, गोजीबाट टिकट वितरण गर्ने परिपाटी अन्त्य हुनुपर्छ,’ उनले भनिन्।
भट्टराईले निर्वाचन ऐन संशोधन गर्न सांसदहरूले विशेष पहल गर्नुपर्ने र बौद्धिक वर्गबाट सुझाव प्रदान गरिनुपर्ने धारणा राखिन्। साथै, राजनीतिक दलसम्बन्धी कानुनलाई अझ बलियो बनाउन आवश्यक रहेको उनले औंल्याइन्।
