राष्ट्रिय फुटबल टिमका नवनियुक्त प्रशिक्षकसमक्ष साफ च्याम्पियनसिप लक्ष्य

काठमाडौँ– नेपाली पुरुष राष्ट्रिय फुटबल टिमका नवनियुक्त प्रमुख प्रशिक्षक म्याट रसले नेपालका लागि साफ च्याम्पियनसिप सुरक्षित गर्ने आफ्नो प्रमुख लक्ष्य रहेको बताएका छन्।

अस्ट्रेलियाली म्याट रस आइतबार नेपाली पुरुष राष्ट्रिय फुटबल टिमको प्रमुख प्रशिक्षकमा नियुक्त भएका हुन्।

उनले अखिल नेपाल फुटबल संघ (एन्फा० सँग एक वर्षको सम्झौता गरेका छन्। आइतबार सातदोबाटोस्थित एन्फा परिसरमा आयोजित एक समारोहमा रस र एन्फाका महासचिव किरण राईले आधिकारिक रूपमा सम्झौतापत्रमा हस्ताक्षर गरेका हुन्।

विन्सेन्जो अल्बर्टो अन्नेसेले आफ्नो एक वर्षे कार्यकाल पूरा गरेपछि मे २०२४ देखि यो पद खाली थियो।

रस यूईएफए प्रो लाइसेन्स होल्डर हुन् र उनले दक्षिण कोरिया, साउदी अरब र चीन जस्ता देशहरूमा प्रशिक्षणको अनुभव हासिल गरेका छन्।

सोमबार एन्फा मुख्यालयमा आयोजित एक उद्घाटन समारोहमा बोल्दै, रसले राष्ट्रिय टिमको प्रशिक्षणको जिम्मेवारी पाएकोमा खुशी व्यक्त गरे। उनले हालै सम्पन्न फोर नेशन्स इन्टरनेशनल महिला च्याम्पियनसिपमा समर्थकहरूको उत्साहपूर्ण सहभागिताले नेपालमा फुटबलप्रति अपार जोश रहेको महसुस गराएको थपे।

उनले नेपालमा खेलकुदको विकासका लागि विद्यालय स्तरबाट नै संरचनागत विकासको आवश्यकतामा जोड दिए।

रसको पहिलो चुनौती मार्च २१ मा सिंगापुरविरुद्धको मैत्रीपूर्ण खेल हुनेछ। सिंगापुरले सिंगापुरको राष्ट्रिय स्टेडियममा नेपालसँग अन्तर्राष्ट्रिय मैत्रीपूर्ण खेलको आयोजना गर्नेछ। यो खेल मार्च २५ मा मलेसियाविरुद्धको एएफसी एसियन कप क्वालिफायर्स प्रतिस्पर्धाका लागि नेपालको तयारीको रूपमा हुनेछ।