सत्तारूढ कांग्रेसका प्रचार विभाग प्रमुख विश्वकर्माले भने – अध्यादेश पारित हुने अवस्था छैन

लुम्बिनी- गठबन्धन सरकारको एउटा घटक नेपाली कांग्रेसका सूचना, सञ्चार तथा प्रचार विभाग प्रमुख एवम् केन्द्रीय सदस्य मीनबहादुर विश्वकर्माले यथास्थितिमा सरकारले ल्याएको अध्यादेश पारित हुने अवस्था नरहेको बताएका छन्। लुम्बिनीमा सोमबार आयोजित साक्षात्कार कार्यक्रममा विश्वकर्माले पार्टीहरूबीचमा असन्तुष्टि आउँदा पारित हुने अवस्था सिर्जना नभएको बताएका हुन्।

विश्वकर्माले अहिलेको गठबन्धन २०८४ सालको निर्वाचनसम्म कायम रहने समेत दाबी गरे। नेता विश्वकर्माले पछिल्लो समय नेपाली कांग्रेस पार्टी चलयामान बन्दै गइरहेको पनि बताए। उनले भने, ‘अहिलेको अवस्थामा ५५ वटा विभाग निर्माण गरी ७७ वटै जिल्लामा विभिन्न कार्यक्रम भइरहेको छ।’

विश्वकर्माले तोकिएको समयमा नै कांग्रेस महाधिवेश हुने बताउँदै अहिले पार्टिभित्र रहेका गुट तथा पक्षहरु अब नहुने तर्क गरे।