हिमाल प्रेस 
काठमाडौँ- युगान्डामा हुने ‘वुमन्स डे कप’ अन्तर्राष्ट्रिय क्रिकेट प्रतियोगिताका लागि नेपाली टोलीको घोषणा भएको छ। नेपाल क्रिकेट संघ (क्यान) ले आइतबार इन्दु बर्माको कप्तानीमा १४ सदस्यीय टोली घोषणा गरेको हो।
साना प्रवीन र रिया शर्माले पहिलोपटक सिनियर टोलीमा स्थान बनाएका छन्। यस्तै बन्द प्रशिक्षणमा रहेका सीमाना केसी, सबनम राई, शोभा रोकाय र मनिषा उपाध्यायले टोलीमा स्थान बनाउन सकेनन्।
मार्च ८ देखि १६ सम्म हुने टी–२० प्रतियोगितामा नेपालसहित युगान्डा, हङकङ र नामिबिबियाको सहभागिता रहनेछ।
एक अर्कासँग दुईपटक प्रतिस्पर्धा गरेपछि शीर्ष दुई टोली फाइनलमा स्थान बनाउने छन्।
नेपालले मार्च ८ मा नामिबियासँग खेल्दै प्रतियोगिताको सुरूवात गर्नेछ। यसैगरी नेपालले मार्च ९ मा युगान्डा र मार्च १० मा हङकङको सामना गर्नेछ। यस्तै नेपालले मार्च १२ मा नामिबिया, १३ मा युगान्डा र १४ मा हङकङसँग फेरि खेल्नेछ।
टी–२० रैंकिङमा नाबिबिया १७, युगान्डा १८, नेपाल २० र हङकङ २१ औँ स्थानमा रहेका छन्।
नेपाली टोली
इन्दु बर्मा (कप्तान), रुविना क्षेत्री, विन्दु रावल, पुजा महतो, सम्झना खड्का, ममता चौधरी, राजमती ऐरी, रोमा थापा, रचनाकुमारी चौधरी, कविता जोशी, ईश्वरी विष्ट, अलिशाकुमारी यादव (विकेटकिपर), साना प्रवीन, रिया शर्मा।
