हिमाल प्रेस 
काठमाडौँ- आईसीसी च्याम्पियन्स ट्रफीअन्तर्गत शनिबार भएको खेलमा दक्षिण अफ्रिकाले इंग्ल्यान्डलाई सात विकेटले पराजित गरेको छ। पाकिस्तानको कराचीमा भएको खेलमा दक्षिण अफ्रिकाले इंग्ल्यान्डलाई पराजित गरेको हो।
पहिले ब्याटिङ गरेको इंग्ल्यान्डले निर्धारित ५० ओभर पनि खेल्न सकेन। ३८.२ ओभर खेलेको इंग्ल्यान्डले दक्षिण अफ्रिकासामु १८० रनको लक्ष्य प्रस्तुत गर्यो।
जवाफमा दक्षिण अफ्रिकाले २९.१ ओभरमा तीन विकेट गुमाएर १८१ रन बनाएर जित हासिल गर्यो। दक्षिण अफ्रिकाका लागि रस्सी वैन डेर ड्युसेनले ८७ बलमा ७२ रन बनाए। त्यस्तै हेनरिक क्लासेनले ५६ बलमा ६४ रन जोडे।
त्यस्तै इंग्ल्यान्डका लागि जोफ्रा आर्चरले दुई र स्पिनर आदिल रशीदले एक विकेट लिए।
यसअघि इंग्ल्यान्डले टस जितेर पहिले ब्याटिङ गर्ने निर्णय गरेको थियो। इंग्ल्यान्डका लागि जोय रूटले सर्वाधिक ३७ रन बनाए। उनले ४४ बलको सामना गरेका थिए।
दक्षिण अफ्रिकाका लागि मार्को जेनसन र वियान मल्डरले ३–३ विकेट, केशव महाराजले २, लुंगी एनगिडी र कागिसो रबाडाले १–१ विकेट लिए।
यो प्रतियोगितामा इंग्ल्यान्डले आफ्नो तीनवटै म्याचमा हार बेहोर्नुपरेको छ। इंग्ल्यान्डलाई अस्ट्रेलिया, अफगानिस्तान र दक्षिण अफ्रिकाले पराजित गरेको छ।
जोस बटलरका लागि इंग्ल्यान्डको तर्फबाट कप्तानका रूपमा अन्तिम म्याचमा थियो। बटलरले एकदिवसीय र टी–२० क्रिकेट टिम छोड्ने घोषणा गरिसकेका छन्।
