हिमाल प्रेस 
फाइल तस्बिर।
काठमाडौँ- ‘व्यवस्था परिवर्तन’ भन्दै राजावादीहरू चलमलाउन थालेपछि गणतन्त्रवादी चार दल सम्मिलित समाजवादी मोर्चा ले ‘काउन्टर’ दिने उद्देश्यले आज काठमाडौँमा प्रदर्शन गर्दैछ।
मोर्चाको प्रदर्शन राजधानीका विभिन्न स्थानहरू निस्कँदै छ। समाजवादी मोर्चामा संलग्न रहेका चार प्रमुख दलमध्ये नेकपा माओवादी केन्द्रले चार स्थानबाट प्रदर्शन आयोजना गर्नेछ।
माओवादी केन्द्रले बबरमहल, कुपण्डोल, त्रिपुरेश्वर र सोहखुट्टे स्थानहरूमा जुलुस प्रदर्शन गर्नेछ। यसका साथै, माधवकुमार नेपाल नेतृत्वको नेकपा एकीकृत समाजवादीले दुई स्थानबाट प्रदर्शन गर्ने योजना बनाएको छ।
एकीकृत समाजवादीले प्रदर्शनलाई मैतिदेवी र डिल्लीबजार क्षेत्रहरूमा केन्द्रित गर्नेछ। यसैगरी, नेत्रविक्रम चन्द ‘विप्लव’ नेतृत्वको नेकपा र महेन्द्रराय यादव नेतृत्वको नेपाल समाजवादी पार्टीले एक–एक स्थानबाट प्रदर्शन गर्नेछन्।
विप्लव नेतृत्वको नेकपाले सुन्धारा क्षेत्रबाट प्रदर्शन गर्नेछ भने नेपाल समाजवादी पार्टीले न्युरोड गेटबाट प्रदर्शन गर्ने तयारी गरेको छ। यस प्रदर्शनको समय अपरान्ह १२ बजेबाट सुरु हुनेछ र प्रदर्शनकारीहरू प्रदर्शनी मार्गमा पुगेर सभामा परिणत हुनेछन्।
