हिमाल प्रेस 
दक्षिण अफ्रिकाका ओपनर रायन रिकल्टन। तस्बिर : आईसीसी
काठमाडौँ- पाकिस्तानमा जारी आईसीसी च्याम्पियन्स ट्रफीको आफ्नो पहिलो खेलमा दक्षिण अफ्रिकाले सानदार जित हात पारेको छ। ओपनर रायन रिकल्टनको शतकमा दक्षिण अफ्रिकाले अफगानिस्तानलाई १०७ रनले पराजित गरेको हो।
दक्षिण अफ्रिकाले दिएको ३ सय १६ रनको विशाल लक्ष्य पछ्याउने क्रममा अफगानिस्तान ४३.३ ओभरमा २ सय ८ रनमा समेटियो।
अफगानिस्तानका रहमत साहले सर्वाधिक ९० रन जोडे। उनले ९२ बलमा ९ चौका र १ छक्का प्रहार गरे। राशिद खान र अजमतुल्लाह उमरजाइ समान १८ तथा गुलबदी नैब १३ रनमा आउट भए।
दक्षिण अफ्रिकाका कागिसो रबडाले ३, वइन मुल्दार, लुंगि एन्गिडीले समान २ , मार्को यानसन र केशव महाराजले समान १ विकेट लिए।
त्यसअघि पाकिस्तानको कराँचीस्थित नेसनल क्रिकेट स्टेडियममा टस जितेर ब्याटिङ रोजेको दक्षिण अफ्रिकाले निर्धारित ५० ओभरमा ६ विकेट गुमाएर ३ सय १५ रन बनाएको थियो।
दक्षिण अफ्रिकाका रिकल्टनले सर्वाधिक १ सय ३ रन जोडे। रिकल्टनले १ सय ६ बलको सामना गर्दै ७ चौका र १ छक्का प्रहार गरे। उनले ओडिआई करियरको पहिलो शतक १ सय १ बलमा पूरा गरे।
एडेन माक्ररमले ३६ बलमा ६ चौका र १ छक्काको सहयोगमा नट आउट ५२ रन जोडे। कप्तान टेम्बा बमुभाले ७६ बलमा ५ चौकाको सहयोगमा ५८ बनाए।
राशी भान डर डुसेनले ४६ बलमा ३ चौका र २ छक्काको सहयोगमा ५२ रन जोडे। डेबिड मिलर १४, टोनी डि जोर्जी ११ रन बनाए भने मार्को यानसन रनको खाता नखोली आउट भए।
अफगानिस्तानका लागि मोहम्मद नाबिले २, फैजल हक फारुकी, नुर अहमद र अजमतुल्लाह उमरजाईले समान १ विकेट लिए।
जितसँगै २ अंकका साथ दक्षिण अफ्रिका समूह ‘बी’ को शीर्ष स्थानमा छ। अफगानिस्तान अंकविहीन छ। शनिवार समूह ‘बी’ मा अस्ट्रेलिया र इंग्ल्यान्डबीच खेल हुनेछ ।
दुई वर्षअघि भारतमा आयोजना भएको ओडिआई विश्व कपको शीर्ष ८ टोली च्याम्पियन्स ट्रफीमा खेल्दैछन्। सहभागी टोली दुई समूहमा विभाजन गरिएको छ। पाकिस्तान, भारत, बंगलादेश तथा न्युजिल्यान्ड समूह ‘ए’ मा छन्।
अस्ट्रेलिया, अफगानिस्तान, इंग्ल्यान्ड र दक्षिण अफ्रिका समूह ‘बी’ मा छन्। समूहका शीर्ष २ टोली सेमिफाइनल पुग्नेछन्। फाइनल फागुन २५ गते (९ मार्च) हुनेछ ।
