हिमाल प्रेस 
काठमाडौँ- भारतको ओडिसा राज्य सरकारले नेपाली छात्रा प्रकृति लम्सालको रहस्यमय मृत्युका सम्बन्धमा छानबिन गर्न उच्चस्तरीय छानबिन समिति गठन गरेको छ। गृह विभागका अतिरिक्त मुख्य सचिव सत्यव्रत साहुको संयोजकत्वमा छानबिन समिति गठन गरिएको हो।
समितिमा महिला तथा बाल विकास विभागकी सचिव सुभा शर्मा र उच्च शिक्षा विभागका आयुक्त अरविन्द अग्रवाल सदस्य रहेको ओडिसा सरकारले जनाएको छ। ओडिसा सरकारको सूचना तथा जनसम्पर्क विभागले मंगलबार जारी गरेको प्रेसनोटमा घटनामा संलग्न सुरक्षा गार्डलाई पक्राउ गरिएको र केही अधिकारीहरूलाई निलम्बन गरिएको उल्लेख छ।
यसैगरी सरकारले गठन गरेको उच्चस्तरीय छानबिन समितिको निष्कर्षका आधारमा उपयुक्त कानुनी तथा प्रशासनिक कारबाही अघि बढाइने प्रेसनोटमा जनाइएको छ। साथै विद्यार्थीविरुद्ध केही व्यक्तिले बल प्रयोग गरिएको सम्बन्धमा आएका उजुरीमाथि छानबिन भइरहेको ओडिसा सरकारले जनाएको छ। दोषी भेटिएमा कानुनअनुसार कारबाही गरिने प्रतिबद्धता सरकारले गरेको छ।
‘ओडिसा सरकार प्रत्येक विद्यार्थीको सुरक्षाको प्रत्याभूति गर्न प्रतिबद्ध छ। विद्यार्थीको सुरक्षा, गरिमा र कल्याण सुनिश्चित गर्न सरकारले आवश्यक सबै कदम उठाउनेछ’, प्रेसनोटमा उल्लेख छ।
ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयको छात्रावासमा नेपाली विद्यार्थी प्रकृति लम्सालको आइतबार शंकास्पद मृत्यु भएको थियो। लम्सालको मृत्यु भएपछि उक्त कलेजमा अध्ययनरत पाँच सयभन्दा बढी नेपाली विद्यार्थीलाई फिर्ता जान निर्देशन दिइएको थियो। यद्यपि दोषी व्यक्तिलाई पक्राउ गरिएपछि घर जान निर्देशन दिइएका विद्यार्थी छात्रावास फर्किएका छन्।
प्रकृति लम्सालको मृत्युपछि निरन्तर कूटनीतिक सम्पर्कमा छौँ : परराष्ट्रमन्त्री
भारतमा छात्राको रहस्यमय मृत्यु : ‘नेपालीमाथि अपमानजनक व्यवहार गरियो’
