ईसीडी शिक्षकलाई स्थायी गर्न सरोकारवालाको सुझाव

काठमाडौँ- प्रारम्भिक बालविकास सहजकर्ता (ईसीडी शिक्षक) लाई स्थायित्वको प्रक्रियामा लगिनुपर्नेमा सरोकारवालाले सुझाव दिएका छन्। विद्यालय शिक्षा विधेयक–२०८० र ईसीडी शिक्षाबारे शनिबार काठमाडौँमा आयोजित एक अन्तर्क्रियामा ईसीडी शिक्षकलाई स्थायी बनाउनुपर्नेमा सुझाव दिइएको हो।

प्रतिनिधिसभाको शिक्षा, स्वास्थ्य तथा सूचना प्रविधि समितिका सभापति अम्मरबहादुर थापा, शिक्षा समितिका सदस्य दीपा शर्मा, ज्ञानु बस्नेत सुवेदी, ईश्वरी घर्ती मगर, रामप्रकाश चौधरी, राजन दाहाल उपस्थित अन्तर्क्रियामा नेपाल शिक्षक महासंघ राष्ट्रिय समिति अध्यक्ष लक्ष्मीकिशोर सुवेदीले महासंघको तर्फबाट बालकक्षाका शिक्षकलाई स्थायित्वको प्रक्रियामा लैजानुपर्ने र बालकक्षा शिक्षालाई विद्यालय संरचनाभित्र ल्याई यसलाई आधारभूत तहमा समेटिनु पर्ने र ‘शिक्षक’ शब्दले सम्बोधन गरिनुपर्ने धारणा राखे।

अध्यक्ष सुवेदीले बालकक्षा शिक्षकको लागि दरबन्दी व्यवस्था गरी सेवा सुविधा प्राथमिक तहका शिक्षक बराबर हुनुपर्ने, बालविकासदेखि कक्षा ३ सम्म कक्षागत र कक्षा ४ पछि विषयगत अध्यापनका लागि सोही अनुसार शिक्षक व्यवस्थापन हुनुपर्ने र विद्यालय, विद्यार्थी र शिक्षक–कर्मचारीका सबै मागमुद्दा सम्बोधन हुने गरी हिउँदे अधिवेशनबाटै विद्यालय शिक्षा ऐन जारी गरिनुपर्नेमा समितिको ध्यानाकर्षण गराए।

अन्तर्क्रियामा डा.मीनाक्षी दाहालले कार्यपत्र प्रस्तुत गरेकी थिइन् भने थुप्रै सहभागीहरूले आआफ्नो विचार राखेका थिए। अन्तर्क्रियामा डा.विद्यानाथ कोइराला, डा.विष्णु कार्की, किशोर श्रेष्ठ, अभिभावक संघकी रमा गिरी, बालकक्षा शिक्षक जयन्ती बस्नेतलगायतले विचार राखेका थिए।