हिमाल प्रेस 
एआईको सहयोगमा बनाइएको प्रतीकात्मक तस्बिर।
काठमाडौँ- त्रेतायुगमा राम र रावण युद्ध हुँदा हनुमानले लंका (अहिलेको श्रीलंका) जलाएको प्रसंग पुराणमा पढ्न पाइन्छ। उतिबेला हनुमानले लंकाको विध्वंस गरेर रामलाई जिताएका थिए। अहिले पनि लंकामा हनुमान अर्थात् बाँदरको जगजगी रहेको चर्चा संसारभर फैलिएको छ। यतिबेला लंकामा हनुमान लंका जलाएर होइन बत्ती निभाएर चर्चामा आएको हो।
बीबीसीका अनुसार श्रीलंकामा देशव्यापी विद्युत् अवरोध भएको छ। त्यसको कारण कोलम्बो दक्षिणमा रहेको एक विद्युत् केन्द्रमा पसेको बाँदरलाई ठानिएको छ। दुई करोड २० लाख जनसंख्या भएको टापु राष्ट्रभर बिस्तारै विद्युत् अवरोध हट्न थालेको छ। यसका लागि स्वास्थ्य संस्था र पानी शुद्धीकरण प्लान्टलाई प्राथमिकता दिइएको छ।
‘एउटा बाँदर हाम्रो ग्रिड ट्रान्सफर्मरसँग सम्पर्कमा आएपछि प्रणालीमा असन्तुलन उत्पन्न भएको छ,’ ऊर्जामन्त्री कुमारा जयाकोडीले पत्रकारहरूसँग भने।
विद्युत् अवरोध आइतबार स्थानीय समयअनुसार बिहान ११ बजे सुरु भएको थियो। त्यसपछि धेरैलाई जेनेरेटरमा निर्भर हुन बाध्य बनायो। अधिकारीहरूले विद्युत् पुनःस्थापना हुन केही घण्टा लाग्न सक्ने बताएका छन्। सामाजिक सञ्जालमा मानिसहरूले उक्त घटनालाई लिएर मजाक गर्दै अधिकारीहरूको आलोचना गरेका छन्। ‘एउटा उत्पाती बाँदरले कोलम्बोको एउटा सबस्टेसनमा बिगारिदिएपछि श्रीलंकाको सम्पूर्ण विद्युत् ग्रिड ठप्प भयो’, एक्स प्रयोगकर्ता मारियो नवफलले लेखेका छन्।
अर्का एक्स प्रयोगकर्ता श्रीनी आरले हनुमानको एक चित्र पोस्ट गरेका छन्। उनले लेखेका छन्, ‘श्रीलंकाले अतीतमा बाँदरको काम देखिसकेको छ।’ स्थानीय समाचारपत्र दैनिक मिररका सम्पादक जमिला हुसेनले लेखेका छन्, ‘श्रीलंकामा मात्र एउटा पावर स्टेसनभित्र बाँदरहरूको झगडाले देशव्यापी विद्युत् कटौती गर्न सक्छ।’
