हिमाल प्रेस 
काठमाडौँ- केन्द्रीय पदाधिकारीमा उमेर हद ३२ वर्ष लागु भएपछि नेकपा माओवादी केन्द्र निकट अखिल क्रान्तिकारीमा नयाँ विवाद सुरु भएको छ।
अहिले क्रान्तिकारीमा केन्द्रीय नेतृत्वलाई उमेर हद लाग्दा प्रदेश र जिल्ला कमिटीलाई लागेको छैन। तर यसअघि नै प्रदेश कमिटी गठन भएकाले प्रदेश अध्यक्षहरू ३२ माथिका छन्। यसैले आफूहरू सिनियर भएको प्रदेश अध्यक्षहरूको दाबी छ।
प्रदेश अध्यक्षहरुले फ्र्याक्सन इञ्चार्जलाई पत्र पठाउँदै विधानमा भएको नीतिगत त्रुटि सच्चाउन माग गरेका हुन्। अखिल क्रान्तिकारीका ९ मध्ये ६ वटा प्रदेश अध्यक्षहरुले संयुक्त पत्र लेखेर विधान नसच्याए पदाधिकारी बैठक, सपथग्रहण कार्यक्रम, स्ववियु कार्यशाला गोष्ठी लगायत कुनै पनि कार्यक्रममा सहभागी नहुने र केन्द्रीय पदाधिकारीहरूलाई प्रदेशको कुनै पनि कार्यक्रममा सहभागी नगराउने चेतावनी दिएका छन् ।
प्रदेश अध्यक्षहरुलाई केन्द्रको उपाध्यक्ष सरहको वरीयता दिनुपर्ने उनीहरुको माग छ । यसैगरी प्रदेशको उपाध्यक्ष र प्रमुख सचिवलाई केन्द्रको उपमहासचिव सरह तथा अन्य पदाधिकारीलाई सचिव वो सोसरह हुने व्यवस्था कायम गरी विधान सच्याउन उनीहरुले माग गरेका छन् ।
