युएसएआइडी ‘अपराधी’ हो : मस्क, युएसएआइडीका नेताहरू ‘कट्टरपन्थी पागल’ हुन् : ट्रम्प

काठमाडौँ- अर्बपति एलन मस्कले अमेरिकी अन्तर्राष्ट्रिय विकास एजेन्सी (यूएएआईडी) लाई ‘आपराधिक संगठन’ भनेका छन्। त्यस्तै राष्ट्रपति डोनाल्ड ट्रम्पले एजेन्सी ‘कट्टर पागलहरूद्वारा सञ्चालित’ भएको दाबी गर्दै यसको भविष्यबारे विचार गरिरहेको बताएका छन्।

विदेशमा मानवीय सहायता प्रदान गर्ने जिम्मेवारी पाएको एजेन्सीमाथिको आक्रमणले ट्रम्पको सरकारी विभागहरूलाई उल्ट्याउन र जोडीले व्यर्थको आधिकारिक खर्च र अधिकार क्षेत्र मान्ने कुराको विरोध गर्न मस्कलाई अभूतपूर्व शक्ति दिने कदममा एउटा महत्त्वपूर्ण नयाँ मोर्चालाई चिह्न लगाएको छ।

‘यूएसएआईडी एक आपराधिक संगठन हो,’ राष्ट्रपतिको सबैभन्दा शक्तिशाली समर्थक बनेका टेस्ला र स्पेसएक्सका अर्बपति मालिक मस्कले आफ्नो एक्स प्लेटफर्ममा यूएसएआईडीलाई ‘दुष्ट सीआइए काम’ मा संलग्न भएको आरोप लगाउने भिडियोको जवाफ दिँदै लेखेका छन्।

त्यसपछिको पोस्टमा मस्कले कुनै प्रमाण नदिई आफ्ना २१ करोड ५० लाख एक्स फलोअर्सलाई सोधेका छन्, ‘के तपाईंलाई थाहा छ कि यूएसएआईडीले तपाईंको कर डलर प्रयोग गरेर कोभिड–१९ लगायत जैविक हतियार अनुसन्धानलाई वित्त पोषित ग¥यो, जसले लाखौँ मानिसको ज्यान लियो?’

उनले यी आरोपहरूबारे थप व्याख्या गरेका छैनन्। यसलाई अघिल्लो प्रशासनका अधिकारीहरूले रुसी दुष्प्रचार अभियानसँग जोडेका थिए।

‘युएसएआइडी कट्टरपन्थी पागलहरूद्वारा सञ्चालित छ र हामी तिनीहरूलाई बाहिर निकाल्दै छौँ। र, त्यसपछि हामी यसको भविष्यका बारेमा निर्णय गर्नेछौँ,’ राष्ट्रपति ट्रम्पले भनेका छन्।

उनले अर्बपति मस्कप्रति आफ्नो समर्थन रहेको बताउँदै भने, ‘मैले मस्कले राम्रो काम गरिरहेको महसुस गरेँ।’

ट्रम्पले सुरुमा सबै सहायता खर्चलाई तीन महिनाका लागि रोकेका छन्। यद्यपि उनले पछि खाद्यान्न र अन्य मानवीय सहायता जारी राख्न छुट दिए। सहायता कार्यकर्ताहरूले स्वतन्त्र एजेन्सीका रूपमा संगठनको भविष्य सुनिश्चित नभएकोले अनिश्चितता छाएको बताएका छन्।

कंग्रेसको एउटा ऐनद्वारा स्थापित स्वतन्त्र एजेन्सी यूएसएआईडीले विश्वभर मानवीय राहत र विकास सहायताका लागि ४२ अर्ब ८० करोड डलरको बजेट व्यवस्थापन गर्दछ।

अमेरिकास्थित संगठनका एकजना वरिष्ठ अधिकारीले ‘आपत्कालीन’ सहायताको प्राथमिकतालाई वासिङ्टनले अरू कुनै पनि कुराका लागि कोष बन्द गर्ने व्यापक योजनाको हिस्सा भएको डर व्यक्त गरे।–रासस