हमासले रिहा गर्‍यो चार बन्धक

काठमाडौँ- हमासले चार जना बन्धकलाई शनिबार रिहा गरेको छ। रिहा गरिएका चारै जना इजरायली महिला हुन्।

हमासले रिहा गरेको चार जना इजरायली बन्धकलाई रेडक्रसको जिम्मा लगाएको बीबीसीले जनाएको छ।

रिहा गरिएका चारै जना इजरायली सैनिक रहेका हमासले बताएको छ। प्यालिस्टिनी वाहनबाट ओर्लिएसँगै उनीहरूलाई मञ्चमा ल्याइएको थियो।

बन्धक रिहा भएपछि तेल अवीवमा खुसीको माहोल देखिएको थियो। चारै जना बन्धकका परिवारका सदस्यहरू घण्टौँदेखि उनीहरूको प्रतिक्षा गरेर बसिरहेका थिए।

इजरायली डिफेन्स फोर्सेजले चार जना बन्धकलाई हमासले रेडक्रसको जिम्मा लगाएको पुष्टि गरेको छ। बन्धकहरूलाई गाजा सीमाबाट सेनाको हेलिकप्टरबाट इजरायल लगिने बताइएको छ।

इजरायल–हमासबीच भएको सम्झौताअनुसार चार जना बन्धक रिहा भएपछि इजरायलले आजीवन कारावासको सजाय काटिरहेका १२० सहित २०० प्यालेस्टिनी कैदीलाई रिहा गर्नेछ।