हिमाल प्रेस 
काठमाडौँ- उपराष्ट्रपति रामसहायप्रसाद यादवसँग नेपालका लागि जापानका राजदूत मायदा तोरूले शुक्रबार शिष्टाचार भेटवार्ता गरेका छन्।
शुक्रबार लैनचौरस्थित उपराष्ट्रपतिको कार्यालयमा राजदूत तोरूले उपराष्ट्रपति यादवसँग भेटवार्ता गरेका हुन्।
भेटका क्रममा दुवै मुलुकबीचको द्विपक्षीय सम्बन्ध, उच्चस्तरीय भ्रमण, आर्थिक सहयोग र सहकार्य तथा द्विपक्षीय व्यापार तथा लगानीलगायतका विषयमा छलफल भएको उपराष्ट्रपति यादवको सचिवालयले जनाएको छ।
उपराष्ट्रपति यादवले नेपाल र जापानबीच ऐतिहासिक सम्बन्ध रहिआएको उल्लेख गर्दै सन् १९५६ मा कूटनीतिक सम्बन्ध स्थापना भएयता दुई देशबीचको सम्बन्ध थप घनिष्ट एवं मैत्रीपूर्ण रूपमा अगाडि बढिरहेको बताए।
जापानसँगको सम्बन्ध र सहयोगलाई नेपालले उच्च महत्व दिएको उल्लेख गर्दै उनले दुवै देशका सरकार र जनस्तरमा अत्यन्त समधुर सम्बन्का साथै राम्रो मित्रता, समझदारी र सहयोगी भावना अभिवृद्धि भइरहेको उल्लेख गरे।
उपराष्ट्रपति यादवले नेपालको सामाजिक तथा आर्थिक विकासका लागि जापानले सन् १९५४ देखि महत्वपूर्ण तथा विश्वासिलो विकास साझेदारका रूपमा रहिआएको बताए।
राजदूत तोरूले नेपाललाई जापानी सहयोग जारी रहने उल्लेख गर्दै नागढुंगा सुरुङमार्ग यसै वर्ष सञ्चालनमा आउने बताए। उनले नेपालले ओसाका एक्सपोमा सहभागिता जनाउने विषयले आफू खुशी भएको उल्लेख गरे।
