हिमाल प्रेस 
फाइल तस्बिर : एफपी
काठमाडौँ– भारतको उत्तर प्रदेशस्थित प्रयागराजमा महाकुम्भ मेलाको आठौं दिन सोमबार दिउँसोसम्म ४४ लाख भन्दा बढी भक्तहरूले पवित्र स्नान गरेका छन्। जनवरी २० सम्म संगम त्रिवेणीमा आठ करोडभन्दा बढी तीर्थयात्रीले स्नान गरेको उत्तर प्रदेश सरकारले जनाएको छ।
यसअघि सोमबार बिहान ८ बजेसम्म २२ लाखभन्दा बढी तीर्थयात्रीले मेला दर्शन गरेको आधिकारिक तथ्यांकले देखाएको छ।
यसैबीच, महानिर्देशक (डीजी) अविनाश चन्द्रले आइतबार भएको महाकुम्भ आगलागीको घटनाबारे अनुसन्धान भइरहेको बताएका छन्।
उनले प्रहरीले घटनाको अनुसन्धान गरिरहेको र विस्तृत अनुसन्धानपछि यकिन कारण खुल्ने बताए।
‘यो घटनाको प्रहरीले अनुसन्धान गरिरहेको छ। स्थानीय प्रहरी अधिकारीहरू यसमा संलग्न छन्। धेरै किसिमका हल्लाहरू आइरहेका छन्। तर छानबिनपछि सही कारण खुल्नेछ,’ उनले भने।
अग्नि सुरक्षा व्यवस्थाका सम्बन्धमा चन्द्रले कुम्भमा भइरहेको तयारीबारे प्रकाश पारे। उनले कुम्भ क्षेत्रमा एक हजार तीन सयभन्दा बढी दमकल तैनाथ गरिएको जानकारी दिए।
मुख्यमन्त्री योगी आदित्यनाथले आगलागी भएको घटनास्थलको भ्रमण गरी घटनास्थलमा रहेका अधिकारी र अग्निनियन्त्रक टोलीसँग कुराकानी गरेका छन्।
प्रधानमन्त्री नरेन्द्र मोदीले आइतबार उत्तर प्रदेशका मुख्यमन्त्री योगी आदित्यनाथसँग कुरा गर्दै घटनाको जानकारी लिएका थिए। १३ जनवरीबाट सुरु भएको महाकुम्भ फेब्रुअरी २६ सम्म चल्नेछ।–रासस
