वाणिज्य बैंकको नाफा घट्यो

काठमाडौँ- चालु आर्थिक वर्ष २०८१/८२ को पहिलो ६ महिनामा वाणिज्य बैंकहरूको खुद नाफा ४.६२ प्रतिशतले घटेर २७.४३ अर्ब रुपैयाँमा झरेको छ। बैंकहरूले अघिल्लो आर्थिक वर्षको सोही अवधिमा २८.७६ अर्ब रुपैयाँ खुद नाफा कमाएका थिए। समीक्षा अवधिमा २० वाणिज्य बैंकहरूमध्ये नबिल बैंक लिमिटेडले ३.२४ अर्ब रुपैयाँ खुद नाफा गर्दै सबैभन्दा धेरै नाफा कमाएको छ।

चालु आर्थिक वर्षको पहिलो छ महिनाका लागि २० वाणिज्य बैंकहरूको वित्तीय विवरण विश्लेषणले ११ बैंकले खुद नाफा वृद्धिको संकेत गरेका छन् भने ९ बैंकको नाफा घटेको छ। प्रभु बैंकले खुद नाफामा ८५.४८ प्रतिशत वृद्धि गरेको छ। उक्त बैंकले २०८१/८२ को पहिलो ६ महिनामा २.०१ अर्ब रुपैयाँ नाफा कमाएको छ। अघिल्लो आर्थिक वर्षमा यो ७६ करोड रुपैयाँ थियो।

एनआईएमबी, ग्लोबल आईएमई, एनएमबी बैंक र एभरेस्ट बैंकले क्रमशः ५७.१८ प्रतिशत, ४९.५१ प्रतिशत, ४५.६ प्रतिशत र २१.१ प्रतिशत खुद नाफा कमाएका छन्। एनआईएमबी बैंक र ग्लोबल आईएमईले २०८१/८२ को पहिलो छ महिनामा क्रमशः २.८३ अर्ब र ३.२४ अर्ब रुपैयाँ खुद नाफा कमाएका छन्। यसैगरी एनएमबी बैंक र एभरेस्ट बैंकले क्रमशः २ अर्ब र २.०७ अर्ब रुपैयाँ खुद नाफा कमाएका छन्।

एनआईसी एसियाको खुद नाफा ९२.०३ प्रतिशतले घटेर चालु आर्थिक वर्षको पहिलो छ महिनामा १५ करोड रुपैयाँमा झरेको छ। अघिल्लो आर्थिक वर्षको सोही अवधिमा यो १.९ अर्ब रुपैयाँ थियो। कुमारी बैंक र राष्ट्रिय वाणिज्य बैंक लिमिटेडले क्रमशः ६८.२ प्रतिशत र ६२.१३ प्रतिशतले नाफा घटाएका छन्।