‘नेपालको फर्निसिङ क्षेत्रलाई निर्यात क्षेत्रका रूपमा विकास गर्न आवश्यक छ’

काठमाडौँ- उद्योग, वाणिज्य तथा आपूर्तिमन्त्री दामोदर भण्डारीले नेपालको फर्निसिङ क्षेत्रलाई निर्यात क्षेत्रका रूपमा विकास गर्न आवश्यक रहेको बताएका छन्। शुक्रबार नेपाल वुड, फर्निचर तथा होम टेक्सटायल अन्तर्राष्ट्रिय प्रदर्शनीको उद्घाटन गर्दै उनले यस्तो बताएका हुन्।

मन्त्री भण्डारीले नेपालको ४६ प्रतिशतले भू–भाग वन क्षेत्रले ओगटेकाले फर्निसिङका लागि यो क्षेत्र प्रचुर सम्भावना बोकेको क्षेत्र भएको बताए। उनले सरकारले फिर्निसिङ क्षेत्रलाई निर्यात क्षेत्रमा विकास गर्न सक्नुपर्नेमा जोड दिए। उनले अहिले पनि नेपालले विदेशमा प्लाइउड धेरै निर्यात गरिरहेको बताए। उनले यो क्षेत्रमा पनि सरकारले विदेशी पुँजी पनि भित्र्याउन खोजेको बताए। उनले नेपाली पुँजीलाई पनि प्रवर्द्धन गरी प्रविधिको विकास गर्न खोजिएको जानकारी दिए।

मन्त्री भण्डारीले विदेशी पुँजी र प्रविधि दुवै भित्र्याउन आवश्यक रहेको बताए। उनले सरकारले वैदेशिक पुँजी प्रविधिसँग जोड्ने योजनामा रहेको बताए। उनले अहिले नेपालको वित्तीय क्षेत्रमा पुँजी थुप्रिएर बसेको भन्दै सम्भावना भएका क्षेत्रमा वित्तीय क्षेत्रले लगानी गर्न आवश्यक रहेको बताए। उनले ग्रामीण क्षेत्रमा करिब एक खर्बभन्दा बढी पुँजी हुने रुखहरू लडिरहेको भन्दै त्यसलाई उपभोगको नीति ल्याउने गरी सरकारले काम गरिरहेको बताए। उनले स्थानीय स्रोत र साधनको प्रयोग स्थानीयले गर्न पाउनुपर्नेमा जोड दिए।

मन्त्री भण्डारीले स्वदेशी वस्तुहरूको प्रदर्शनीहरू काठमाडौँमा मात्रै सीमित हुन नहुने भन्दै सात प्रदेशका औद्योगिक क्षेत्रहरूमा आयोजना गर्न आवश्यक रहेको बताए।