हिमाल प्रेस 
काठमाडौँ- फागुन १४ गतेबाट प्रदर्शनमा आउन लागेको फिल्म ‘मायावी’को दुई नयाँ पोस्टर सार्वजनिक भएको छ। निर्माण पक्षले फिल्मको एउटा गीत सार्वजनिक गरेपछि दुई नयाँ पोस्टर सार्वजनिक गरेको हो। सार्वजनिक पोस्टरमा नायक पल शाह र नायिका दीपिका प्रसाईँलाई स्थान दिइएको छ।
एक पोस्टरमा पल दीपिकासँग रोमान्टिक देखिएका छन् भने अर्को एक पोस्टरमा पल भावुक देखिएका छन्। दुई पोस्टरबाट फिल्मले प्रेम र पीडाको भाव व्यक्त गर्ने बुझ्न सकिन्छ।
दिवाकर भट्टराईको लेखन तथा निर्देशनमा तयार भएको फिल्ममा क्रियटिम सिने आर्टस् र नेम महर्जनको लगानी छ। फिल्ममा ध्रुव न्यौपाने, राज कटुवाल र चन्द्र पन्त निर्माताको रूपमा छन्। साथै फिल्ममा राजु पराजुली र सुमित वली सहनिर्माताको रूपमा छन्।
फिल्ममा पल र दीपिकाको साथा सुशील सिटौला, करिश्मा श्रेष्ठ र नव-कलाकार समीम खानको अभिनय छ। साथमा फिल्ममा राजाराम पौडेल, प्रशान्त ताम्राकार, लक्ष्मी गिरी, अंशु महर्जन, रवि डंगोल, रमा प्रसाँई, दीपेन्द्र सिम्खडा, संगीता सिलवाल लगायतका कलाकारहरुको पनि अभिनय छ। यो फिल्मको कार्यकारी निर्माता प्रविन भट्टराई र करण सिंह हुन्।
फिल्ममा मिलन श्रेष्ठको सम्पादन, बसन्त अधिकारीको सहनिर्देशन, शम्भुजित बास्कोटा र एसडी योगीको संगीत, कविराज गहतराज र प्रविण सिंहको कोरियोग्राफी छ। राकेश दाहालले पोस्टरको डिजाइन गरेका हुन्। विकास खतिवडाले पोस्टरका लागि फोटोसुट गरेका हुन्।
फिल्म ‘मायावी’ले प्रेम, विछोड र मित्रताको कथा भन्छ। सांगीतिक प्रेम कथामा बनेको फिल्मलाई वर्षकै प्रतीक्षित फिल्मको रूपमा हेरिएको छ।
