हिमाल प्रेस 
तिब्बतमा चाङ्सुओ टाउनसिप गाउँमा भूकम्पपछि क्षतिग्रस्त घर। तस्बिर : सिन्हवा/रासस
काठमाडौँ- नेपालको सिमाना नजिकै तिब्बतमा मंगलबार बिहान गएको भूकम्पमा परी मृत्यु हुनेको संख्या ९५ पुगेको छ। ६.८ म्याग्निच्युडको भूकम्पमा परी चीनको सिग्जा प्रान्तको डिङ्ग्री काउन्टीमा ९५ जनाको मृत्यु भएको चिनियाँ समाचार माध्यम ग्लोबल टाइम्सले उल्लेख गरेको छ। भूकम्पमा परी कम्तीमा १३० जना घाइते भएका छन्।
क्षतिको विवरण संकलन भइरहेकाले मृतक र घाइतेका संख्या बढ्न सक्ने समाचारमा उल्लेख छ। भूकम्पका कारण चाङसुओ क्षेत्रका गाउँमा घर भत्किएका छन्। उद्धारका लागि सुरक्षाकर्मी र स्वयंसेवकहरू परिचालन भएका छन्।
भूकम्पको धक्का नेपालसहित उत्तरी भारतमा समेत महसुस गरिएको छ। नेपालको भूकम्प मापन केन्द्रले ७ म्याग्निच्युडको भूकम्प गएको रेकर्ड राखे पनि चीनको भूकम्प नेटवर्क केन्द्रले ६.८ म्याग्निच्युड मापन गरेको छ।
चीनबाहेक अन्य क्षेत्रमा मानवीय क्षति भने नभएको सञ्चारमाध्यमले जनाएका छन्। नेपालका काठमाडौँसहित पूर्वी जिल्लामा भूकम्पको महसुस गरिएको छ। विभिन्न जिल्लामा केही भवनमा सामान्य क्षति पुगे पनि अन्य विवरण प्राप्त भएको छैन।
यसैबीच चीनका राष्ट्रपति सी जिनपिङले भूकम्प प्रभावित क्षेत्रमा सबै प्रकारको उद्धारका प्रयासमा तीव्रता दिन आदेश दिएका छन्। उनले घाइतेहरूको उपचारमा सक्रिय हुन पनि आदेश दिएको सिन्हवाले जनाएको छ। सीले प्रकोप रोक्न, प्रभावित बासिन्दालाई उपयुक्त रूपमा पुनर्स्थापित गर्न र विपत्तिपछि भएको कामलाई प्रभावकारी तरिकाले सञ्चालन गर्न पनि आह्वान गरेका छन्।
राष्ट्रपति सीले आपत्कालीन उद्धार सामग्री चाँडो आपूर्ति गर्न, क्षतिग्रस्त पूर्वाधारको मर्मत कार्यलाई तीव्रता दिन, पीडितका आधारभूत आवश्यकताहरू पूरा गर्न र सबैका लागि सुरक्षित आवश्यक रहेको बताएका छन्।
