हिमाल प्रेस 
फाइल तस्बिर
काठमाडौँ- चालु आर्थिक वर्ष २०८१/८२ मा धान उत्पादन ४.०४ प्रतिशतले बढेको छ। कृषि तथा पशुपन्छी विकास मन्त्रालयले शुक्रबार सार्वजनिक गरेको विवरणअनुसार यस वर्ष कुल ५९ लाख ५५ हजार ४७६ मेट्रिक टन धान उत्पादन भएको हो। यो गत आवको भन्दा ४.०४ प्रतिशतले धेरै हो।
मन्त्रालयका अनुसार गत वर्ष ५७ लाख २४ हजार १३४ मेट्रिक टन धान उत्पादन भएको थियो। यस वर्ष औषत उत्पादकत्व ४.१९ मेट्रिक टन प्रतिहेक्टरमा पुगेको छ। समग्रमा चैते धानको उत्पादकत्व वर्षेको भन्दा बढी देखिएको मन्त्रालयले जनाएको छ।
चैते र वर्षे दुवै गरी चालु आवमा कुल १४ लाख २० हजार ६३६ हेक्टर क्षेत्रफलमा धानखेती गरिएको मन्त्रालयले सार्वजनिक गरेको विवरणमा छ। प्रदेशगत हिसाबले कोशी, मधेश, लुम्बिनी र सुदूरपश्चिममा धान उत्पादन बढेको छ। गण्डकी र कर्णाली प्रदेशमा भने धान उत्पादन घटेको मन्त्रालयको विवरणमा उल्लेख छ।
