हिमाल प्रेस 
काठमाडौँ- फिल्म ‘मिसिङः केटी हराएको सूचना’ को ‘सपनीमा’ बोलको गीत सार्वजनिक भएको छ। ललितपुरको पुल्चोकस्थित लबिम मलमा कार्यक्रम गर्दै गीत सार्वजनिक गरिएको हो।
गीतमा इन्दिरा जोशी र करण परियारको स्वर छ। करुण थापाको शब्द रहेकाे गीतमा उनले नै संगीत भरेका छन्। यही गीतमार्फत गीतकार थापाले २० वर्षपछि पाश्र्व गीत लेखनमा कमव्याक गरेका हुन्। एकस्टिक नेपालका स्टुडियोमा रेकर्ड गरिएको गीतमा फणिन्द्र राईको संगीत संयोजन छ।
गीतमा फिल्मका मुख्य कलाकार नाजिर हुसेन र सृष्टि श्रेष्ठले अभिनय गरेका छन्। नाजिरले परिकल्पना गरेको घर र परिवारबाट सुरुवात भएको गीतमा नाजिर र सृष्टिलाई रोमान्टिक भावमा देखाइएको छ। ग्रामीण परिवेशमा छायांकन गरिएको गीत डान्सिङ शैलीमा प्रस्तुत गरिएको छ।
कार्यक्रममा गायिका इन्दिराले तराईको पात्रलाई फिल्ममा हिरोको रुपमा स्थापित गराएको भन्दै आफुले स्वर दिन पाएकोमा खुसी भएको बताइन्। गायक करणले पाश्र्व गायनको सपना ‘मिसिङः केटी हराएको सूचना’ले पूरा गरेको खुलाए। गीतकार र संगीतकार करुणले फिल्मका निर्देशक दीपैन्द्र गौचन र आफ्नाे पुरानो साथी रहेकाले उनकै अनुरोधमा गीत लेखेको बताए।
ट्राई सिटी पिक्चर्स प्रस्तुतकर्ता रहेको फिल्म ट्राई सिटी पिक्चर्सकै ब्यानरमा बनेको छ। फिल्म आगामी माघ ११ मा प्रदर्शन हुनेछ। फिल्म दीपेन्द्र गौचनले निर्देशन गरेका हुन्। फिल्ममा दीपेन्द्र गौचनको कथा र लेखन, अमित पोखरेल र अमितेष शाहको सहायक लेखन, अमित पोखरेलको स्क्रिप्ट सुपरभिजन छ।
नाजिर, सृष्टिसहित फिल्ममा सञ्जय गुप्ता, रामनारायण ठाकुर, मदन ठाकुर, रिना रिमाल, कौशल्या ठाकुर, ललितादेवी मिश्र, रुपेश मण्डल, सुदीप पटेल, अनिल कुर्मी, मनोज शाह, अर्जुन पोखरेल र ओमप्रकाश कर्णको अभिनय छ।
फिल्म अमर महर्जनको डीओपी, निमेष श्रेष्ठको सम्पादन, शंकर महर्जनको द्वन्द्व, दीपेन्द्र गौचन, प्रवेश मल्लिक र करुण थापाको संगीतमा बनेकाे छ।
यस्ताे छ गीत
