हिमाल प्रेस 
काठमाडौँ- चर्चित फिल्म ‘होस्टेल’ को तेस्रो सिक्वेल आगामी फागुन २३ मा प्रदर्शन हुने भएको छ। निर्माण टिमले फिल्मको पोस्टरसहित फागुन २३ लाई मिति सार्वजनिक गरेका हुन। यसअघि फागुन १६ मा प्रदर्शन गर्ने तयारी थियो।
पोस्टरमा फिल्मका प्रमुख पात्र आशिष घिमिरे, पारस बम (कुलब्वाई), रिहान गिरी, र पदम तामाङ रमाइलाे गतिविधि गरिरहेको देखिन्छ।
‘होस्टेल ३’ले क्याम्पस जीवनको संघर्ष, मित्रता, र रमाइला क्षणहरूको कथा प्रस्तुत गर्नेछ। फिल्म सशान कँडेलले निर्देशन गरेका हुन्। उनकै कथा रहेको फिल्मको पटकथा माधव शर्माले लेखेका छन्।
फिल्ममा पारस, रिहान, आशिष, पदमसहित सिम्रन पन्त, हेना नगरकोटी, उमर खान, समा पराजुली, सन्तोष बानियाँ, रोहन श्रेष्ठ, आशिष पुरुषलगायत कलाकारको अभिनय छ।
अर्जुन पोखरेल, अलमोडा राणा उप्रेती, महेश ज्ञवाली र किरण माइकलको संगीत रहेको फिल्ममा विकास दाहालको सम्पादन, प्रवीण सिंह र रोशन विश्वकर्माको कोरियोग्राफी, हिमाल केसीको द्वन्द्व निर्देशन छ।
फिल्म सम्मान इन्टरटेनमेन्टले आरोन कन फिल्म्ससँगको सहकार्यमा निर्माण गरेको हो। फिल्मको निर्मातामा कर्ण कार्की र गोविन्द अधिकारी छन्।
‘होस्टेल’ शृंखलाले नयाँ कलाकारलाई नेपाली सिने उद्योगमा स्थापित गराउँदै आएको छ। ‘होस्टेल’ फिल्मबाट अनमोल केसी, सलोन बस्नेत, र प्रकृति श्रेष्ठले डेब्यु गरेका थिए भने ‘होस्टेल रिटर्न्स’ले स्वस्तिमा खड्का, सुशील श्रेष्ठ, नजिर हुसेन, र सुशील सिटौलालाई परिचित गराएको थियो। यसवर्ष पनि प्रायः नवकलाकारनै जोडिएका छन्।
२०७० सालमा रिलिज भएको ‘होस्टेल’ र २०७२ सालमा आएको ‘होस्टेल रिटर्न्स’ दुवै फिल्मले घरेलु बक्स अफिसमा सफलता हासिल गरेका थिए।
