हिमाल प्रेस 
काठमाडौँ- यो सिजनमा इंग्लिस टिम म्यानचेस्टर युनाइटेडको खराव लय चलिरहेको छ। गएका सिजनमा इंग्लिस प्रिमियर लिगमा शीर्ष ५ मा पर्ने टोली यसपटक मध्यतिर मात्र परिरहेको छ। युनाइटेडले पछिल्ला ४ खेलमध्ये २ मा जित र २ मा हार व्यहोरेको छ।
खराव लयलाई निरन्तरता दिँदै युनाइटेडले आइतबार राति पनि घरेलु मैदानमै बर्नमाउथसँग ३-० ले पराजित बनेको छ। जितसँगै बर्नमाउथ १७ खेलमा २८ अंकका साथ पाँचौं स्थानमा उक्लिएको छ। पराजित युनाइटेड समान खेलबाट २२ अंकका साथ १३औं स्थानमा छ।
ओल्ड ट्राफोर्डमा बर्नमाउथलाई जित दिलाउन डिन हुइसेन, जस्टिन क्लुइभर्ट र एन्टोइन सेमेन्योले गोल गरे। खेलको २९औं मिनेटमा हुइसेनको गोलमार्फत बर्नमाउथले अग्रता लिएको थियो। ६१औं मिनेटमा क्लुइभर्टले पेनाल्टीमार्फत टोलीको अग्रता दोब्बर बनाए।
त्यसको दुई मिनेटपछि नै सेमेन्योले गोल गर्दै बर्नमाउथलाई ३-० को सहज जित दिलाए। लिगअन्तर्गत आइतबारै सम्पन्न खेलमा उल्भरह्याम्पटनले लेस्टर सिटीलाई ३-० ले पराजित गर्दा चेल्सी एभर्टन तथा फुलहम साउथह्याम्पटनसँग गोलरहित बराबरीमा रोकिए ।
