हिमाल प्रेस 
काठमाडौँ- एट्लेटिको मड्रिडले स्पेनिस ला लिगामा बार्सिलोनामाथि पूनरागमन निकाल्दा शीर्षमा पुगेको छ। शीर्षमा रहेको बार्सिलोनामाथि जित निकाल्दै एट्लेटिकोले ३ अंकको अग्रता कायम गरेको हो।
एक गोलले पछि परेको स्थिति उल्ट्याएर एट्लेटिकोले बार्सिलोनामाथि २-१ को पूनरागमन जित दर्ता गर्दै शीर्षस्थानमा उक्लन सफल भएको हो। एट्लेटिकोको जितमा रोड्रिगो डि पउल र एलेक्सन्डर सोर्लोथले गोल गरे। बार्सिलोनाका पेड्रीको गोल सान्त्वना बन्यो।
बार्सिलोनाको मैदानमा शनिबार राति भएको खेलको ३०औं मिनेटमा पेड्रीको गोलबाट घरेलु टोलीले पहिलो हाफमा १-० को अग्रता लिन सफल भयो। एट्लेटिकोको कमजोर डिफेन्सको फाइदा उठाउँदै आँफैबाट आएको बललाई गाभीले ब्याकहिलमार्फत मिलाइदिएपछिछ पेड्रीले सहजै फिनिस गरे।
तर, त्यो अग्रतालाई बार्सिलोनाले दोस्रो हाफमा जोगाउन सकेन। ५९औं मिनेटमा बार्सिलोना अग्रता दोब्बर पार्नबाटट चुक्यो। राफिन्हाको चिप प्रहार क्रसबारमा लागेर फर्कदा रोबटर्ट लेवान्डोस्कीको प्रहार डिफेन्डरलाई लाग्दै बाहिरियो।
त्यसको एक मिनेटपछि एट्लेटिको खेलमा फर्कियो। ६०औं मिनेटमा रोड्रिगो डि पउलले गोल गर्दै खेललाई १-१ गोलको बराबरीमा ल्याए । क्रसबाट आएको बललाई कसाडोको कमजोर ब्याकहिलमार्फत क्लियरेन्सलाई पउलले दोस्रो बार च्याप्दै सहजै फिनिस गरे।
बराबरीपछि बल पोसेसन राख्दै खेलमा पकड बनाएपनि बार्सिलोनाले खेलको अन्तिम समयमा गोल खान पुग्यो । बार्सिलोनाको लगातारको आक्रमणलाई गोलरक्षक जान ओब्लाकले विफल पारिरहँदा अर्कोतर्फ एट्लेटिकोले गोल गर्दै महत्वपूर्ण ३ अंक बटुल्न सफल भयो ।
७६औं मिनेटमा राफिन्हाको क्रसलाई रोबर्ट लेवान्डोस्की र फेरान टोरेसले भेट्न सकेन । ८६औं मिनेटमा राफिन्हाकै प्रहारलाई ओब्लाकले विफल पारे । इन्ज्युरी समयको थप गरिएको छैटौं मिनेटमा परिवर्तित खेलाडी सोर्लोथले गोल गर्दै एट्लेटिकोलाई पुनरागमन जित दिलाए ।
७३औं मिनेटमा मार्कस लोरेन्टेको स्थानमा मैदान छिरेका सोर्लोथले नाहुल मोलिनाको पासमा कुनै गल्ती गरेनन् । राफिन्हाको पासलाई रोड्रिगोले डि पउलले भेटेपछि काउन्टर अट्याकमा उनले मोलिनालाई पास दिए । त्यही पासलाई सोर्लोथले १२ यार्डबाटट भलीमार्फत फिनिस गरे ।
यस जितसँगै एट्लेटिको ला लिगाको शीर्षस्थानमा उक्लिएको छ । एट्लेटिकोको १८ खेलबाट ४१ अंक पुगेको छ । एक खेल बढी खेलेको पराजित बार्सिलोना अब शीर्षस्थानको एट्लेटिकोसँग ३ अंकले पछि परिसकेको छ ।
बार्सिलोना ३८ अंकसहित दोस्रो स्थानम छ । ला लिगामा सानदार सुरुवात गरेको बार्सिलोनाले पछिल्ला सात खेलमा केवल ५ अंक मात्रै बटुलेको छ।
११ नोभेम्बरमा रियल सोसिडाडसँग पराजित भएयता बार्सिलोनाले सेल्टा र रियल बेटिससँग २-२ गोलको बराबरी खेल्दा लास पाल्माससँग २-१ र लेगानेससँग १-० ले पराजित भएको थियो । मलोर्कालाई भने ५-१ ले पराजित गरेको थियो ।
