हिमाल प्रेस 
काठमाडौँ- नेपाल प्रिमियर लिग (एनपीएल)मा आज (बुधबार)देखि प्लेअफका खेलहरू सुरु हुँदैछन्। एनपीएलको लिग चरणको खेलबाट शीर्ष चारमा रहने टोलीले प्लेअफमा स्थान बनाएका हुन्।
अंक तालिकाको शीर्ष र दोस्रो स्थानमा रहने टोलीले पहिलो क्वालिफायर्स खेल्नेछन्। तेस्रो र चौथो स्थानमा रहने टोलीले एलिमिनेटर खेल्नेछन्। कीर्तिपुरस्थित त्रिवि क्रिकेट मैदानमा बुधबार बिहान हुने पहिलो खेलमा एलिमिनेटर खेलमा तेस्रो स्थानको चितवन राइनोज र चौथो स्थानमा रहेको कर्णाली याक्स भिड्नेछन्।
खेल बिहान ९ बजेदेखि सुरु हुनेछ। यो खेलको विजेताले दोस्रो क्वालिफायर्स खेल्नेछ। पराजित हुने टोली भने प्लेअफबाटै बाहिरिनेछ। बुधबारको दोस्रो खेलमा पहिलो क्वालिफायर्स खेल हुनेछ। पहिलो क्वालिफायर्समा शीर्ष स्थानको सुदुरपश्चिम रोयल्स र दोस्रो स्थानको जनकपुर बोल्ट्स खेल्नेछन्। सो खेल दिउँसो १ बजेदेखि सुरु हुनेछ।
यो खेलको विजेताले सिँधै फाइनलमा स्थान पक्का गर्नेछ। पराजित हुने टोलीले भने फाइनल पुग्नका लागि अर्को एक मौका पाउनेछ।
दोस्रो क्वालिफायर्समा पहिलो क्वालिफायर्समा पराजित हुने टोली र एलिमिनेटरको विजेता टोली भिड्नेछन्। दोस्रो क्वालिफायर्स खेल बिहीबार हुनेछ। फाइनल खेल शनिबार हुनेछ।
पहिलो संस्करणको एनपीएल विजेताले एक करोड १० लाख रुपैयाँ पाउने भएको छ। यो पुरस्कार रकम नेपाली खेलकुदमा अहिलेसम्मको सर्वाधिक पुरस्कार रकम हो।
एनपीएलको उपविजेताले ५१ लाख रुपैयाँ प्राप्त गर्नेछ। तेस्रो स्थानमा रहने टोलीले २५ लाख र चौथो स्थानमा रहने टोलीले १५ लाख रुपैयाँ पाउनेछन्।
