हिमाल प्रेस 
दाङ- घोराही उपमहानगरपालिका-१८ घोरदौरामा जिपलाइन सञ्चालन गरिँदैछ। घोराही-१८ रझेनाका सुभास गौतमले घोरदौरा जिपलाइन एण्ड एडभेन्चर रिसोर्टमा जिपलाइन परीक्षण गर्न सुरु गरिएको बताए। घोरदौरा आफैँमा पर्यटकीयस्थल भएकाले यसको थप प्रवर्द्धनमा टेवा पुर्याउने उद्देश्यले सुरुआत गरिएको उनले बताए।
‘अहिले काम अन्तिम चरणमा पुगेको छ, अबको एक महिनापछि पूर्ण रूपमा सञ्चालन गर्ने तयारीमा छौँ’, सञ्चालक गौतमले भने। साढे सात सय मिटर लामो जिपलाइन साहसिक र रोमाञ्चक हुने उनले बताए।
छिट्टै सञ्चालनमा आउन लागेको जिपलाइनसँगै स्काई साइक्लिङ पनि हुनेछ। स्काई साइक्लिङ भने एक सय ५५ मिटर लामो रहने छ। घोरदौरा जिपलाइन एन्ड एडभेन्चर रिसोर्टमा जिपलाइन र स्काई साइक्लिङको काम केही बाँकी रहेका कारण प्राविधिकको टोलीले काम गरिरहेको उनी बताउँछन्।
हालसम्म एक करोड रुपैयाँ बढी लगानी लागेको र अझै काम भइरहेकाले लगानी बढ्ने गौतमको भनाइ छ। घोरदौरामा जीपलाइन र स्काई साइक्लिङ सञ्चालनमा ल्याउनुको मुख्य उद्देश्य यहाँको पर्यटन प्रवर्द्धन गर्नु हो।
जिपलाइनका लागि एक हजार आठ सय ५० शुल्क निर्धारण गरिएको र साइक्लिङको भने काम भइरहेकाले अझै शुल्क निर्धारण नभएको सञ्चालक गौतमले बताए।
