हिमाल प्रेस 
काठमाडौँ- कवि श्रवण मुकारुङका कविता अब फिल्ममा पनि सुन्न पाइने भएको छ। कवि मुकारुङले फिल्म ‘दुखी आत्मा’ का लागि बिभिन्न शीर्षकका १० वटा कविता लेखेका छन्।
दीपेन्द्र लामा लेखन तथा निर्देशनमा बनेकाे फिल्म ‘दुखी आत्मा’ को पटकथा अनुसार कवि मुकारुङले रचेका ती कविता फिल्मभित्र कथाअनुसार राखिएको छ।
माथि माथि शैलुङुगेमा, तिमी तारेभीर, राई माइलाले गाउँ छोड्यो रे जस्ता चर्चित गीतका रचनाकार मुकारुङले आफू ‘दुखी आत्मा’ मा फुलटाइमर कविका रुपमा आवद्ध हुन पाएकोमा खुसी व्यक्त गरेका छन। ‘चलचित्रका फराकिला दर्शक समूहमाझ कविता पुग्नु कुनै पनि स्रष्टाका लागि उत्साहजनक हो,’ उनी भन्छन्, ‘म आफ्ना कवितालाई फरक प्लेटफर्ममा हेर्न आतुर छु।’
फिल्मको प्रमुख पात्रको मनोविज्ञान र यसअघि मुकारुङले लेखेका कविताहरुको स्वभावबीच एकरुपता पाइएकोले उनलाई कविता रच्न लगाएको निर्देशक लामाले बताए। उनले भने, ‘कवि मुकारुङका कविताले फिल्मको कलात्मक उचाइ र कथाको आयामलाई बढाउने काम गरेको छ। पात्रको कतिपय भाव र सोचाइलाई संवाद वा दृश्यमार्फत् प्रस्तुत गर्न गाह्रो हुन्छ, त्यसैले यसमा कविताको सहारा लिइएको हो।’
निर्देशक लामा मुकारुङका कविताहरुले आफ्नो फिल्मको पात्र र परिबेशलाई न्याय मिलेको दावी गर्छन्। मुकारुङका अधिकांश कविता ‘दुखी आत्मा’ का प्रमुख अभिनेता दयाहाङ राई माथि फिचरिङ गरिएको छ।
फिल्म आगामी फागुन २ अर्थात् भ्यालेन्टाइन्स डे काे अवसरमा प्रदर्शन गर्ने निर्माण टिमकाे तयारी छ। फिल्ममा दयाहाङ राई, आँचल शर्मा, अनुपविक्रम शाही, बुद्धि तामाङ, रेयर राईलगायत कलाकारले अभिनय गरेका छन्।
क्लक वर्क क्रियसनको ब्यानरमा बन्ने फिल्ममा निर्माता हिमाल कडरिया हुन्। फिल्म आरआर फिल्मस्ले बितरण गर्दैछ।
