हिमाल प्रेस 
काठमाडौँ– विद्यार्थी नेतृत्वको क्रान्तिमा पूर्वप्रधानमन्त्री शेख हसिनालाई अपदस्थ गरेपछि उत्पन्न दुई छिमेकी देशबीचको तनाव कम गर्न भारतका उच्च कूटनीतिज्ञ सोमबार बंगलादेश पुगेका छन्।
पूर्वप्रधानमन्त्री हसिना प्रशासनलाई भारतले समर्थन गरेको थियो। बंगलादेशमा विद्यार्थीले सरकारी जागिरको कोटा प्रणालीमा गरिएको अनियमिततालाई देखाउँदै शुरू गरेको आन्दोलनले उचाइ लिँदा ७७ वर्षीया हसिना आफ्ना परिवारका केही सदस्यसहित हेलिकप्टरबाट नयाँ दिल्लीमा पुगेकी थिइन्। बंगलादेशले उनको सुपुर्दगीको माग गर्ने बताएको छ।
नोबेल पुरस्कार विजेता तथा प्रजातान्त्रिक सुधारहरू कार्यान्वयन गर्ने जिम्मा पाएको अन्तरिम सरकारका नेता मुहम्मद युनुसको नेतृत्वको प्रशासनसँग भारतीय कुटनीतिज्ञ औपचारिक छलफलका लागि ढाका पुगेको यो पहिलो अवसर हो।
भारतीय विदेश मन्त्रालयका सचिव विक्रम मिश्र हसिनाको बहिर्गमनपछि दुवै देशका उच्च अधिकारीबीच पहिलो पटक व्यक्तिगत बैठकका लागि सोमबार बंगलादेशको राजधानी ढाका पुगेका हुन्।
‘दुई देशबीचको सम्बन्धमा गुणात्मक परिवर्तन आएको छ भन्ने कुरालाई स्वीकारर्नु आवश्यक छ,’ बंगलादेशका विदेशमन्त्री तौहिद हुसेनले मिश्रको भ्रमणअघि आइतबार भनेका थिए,‘वास्तविकतालाई स्वीकार गर्दै सम्बन्धलाई अगाडि बढाउनुपर्छ।’
मिश्रले ढाकामा रहँदा तौहिद र युनुससँग भेटघाट गर्ने कार्यक्रम तय भएको छ।
भारतले मुस्लिम बहुल बंगलादेशको हसिनापछिको आफ्नो अल्पसंख्यक हिन्दू समुदायलाई सरकारले प्रतिशोधपूर्ण आक्रमणबाट पर्याप्त संरक्षण गर्न नसकेको आरोप लगाउँदै आएको छ।
गत महिना राजद्रोहको आरोपमा बंगलादेशमा एक प्रमुख हिन्दू धार्मिक व्यक्तिको गिरफ्तारीले तनावलाई अझ बढाएको छ।
प्रधानमन्त्री नरेन्द्र मोदीको भारतीय जनता पार्टी र यसका समर्थकहरूले आफ्नो सरकारलाई ढाकाको बारेमा थप कठोर अडान लिन आग्रह गरेका छन्।
युनुसको प्रशासनले हिन्दूहरूमाथि भएको आक्रमणलाई बारम्बार स्वीकारेको छ र निन्दा गरेको छ। कतिपय घटनाहरूमा उनीहरू धर्मभन्दा राजनीतिबाट प्रेरित भएको युनुस प्रसासनको बुझाइ छ।
युनुसले भारतले हिंसाको मात्रालाई अतिरञ्जित गरेको र आफ्नो सरकारविरुद्ध ‘प्रोपोगान्डा अभियान’ चलाएको आरोप लगाएका छन्।
हसिनाको पलायनपछि बंगलादेशमा भारतविरोधी थुप्रै सडक प्रदर्शन भएका छन्।
आइतबार विपक्षी बंगलादेश नेसनलिस्ट पार्टी (बीएनपी) का सयौं कार्यकर्ताले ढाकास्थित भारतीय उच्चायोग (दूतावास) सम्म मार्च निकालेका थिए। तर प्रहरीको हस्तक्षेपछि प्रदर्शन मत्थर भएको थियो।
