फेरि आउने ‘बाचा’ गर्दै फर्किए शिखर धवन

काठमाडौँ- नेपाल प्रिमियर लिग (एनपीएल) खेल्न नेपाल आएका भारतीय क्रिकेटर शिखर धवन स्वदेश फर्किएका छन्। उनी फर्किनुअघि एभरेस्ट बेस क्याम्प घुम्न निस्किएका थिए।

शिखर आवद्ध कर्णाली याक्सका मालिक गृहेन्द्र घिमिरेसँग उनी मनाङ एयरको हेलिकोप्टरमा बेसक्याम्प गएका थिए। फर्किएर होटलमा आएपछि धवनलाई फ्रेन्चाइजले औपचारिक विदाइ गरेको थियो ।

बेलुकी ५ः३० बजे एयर इन्डियाको उडानबाट धवन भारत गएका छन्। उनले एनपीएलका चारवटा म्याच खेले। एनपीएलमा सहभागी उनी सबैभन्दा चर्चित विदेशी अनुहार थिए। धवनले कर्णालीबाट ४ म्याच खेले। उनी घुँडाको समस्या र अर्को लिग जुधेकाले थप खेलमा सहभागी हुन नसकेका हुन्।

उनले चारमध्ये एक खेलमा अर्धशतक प्रहार गरे। काठमाडौं गुर्खाजविरूद्ध नटआउट ७४ रन जोड्दा चितवन राइनोजसँग ४५ रन र जनकपुर बोल्ट्ससँग १४ रन बनाएका थिए। उनले चार खेलमा कुल १३६ रन जोड्न सके। जनकपुरविरूद्ध खेल्दा क्यानेडियन अलराउन्डर हर्ष थाकर र चितवनविरूद्ध खेल्दा नामिबियाका लोफ्टी इटनले धवनको विकेट लिएका थिए। उनी नेपालको वातावरण राम्रो रहेकाले फेरि आउने बताएका थिए।