विद्रोही समूहको कब्जामा सिरिया, राष्ट्रपति असद देश छोडेर भागे

हिमाल प्रेस २३ मंसिर २०८१ १५:२०
10
SHARES
विद्रोही समूहको कब्जामा सिरिया, राष्ट्रपति असद देश छोडेर भागे तस्बिर ; एफपी

काठमाडौँ- विद्रोही समूहले सिरियाको राजधानी दमास्कसलाई नियन्त्रणमा लिएको छ। राष्ट्रपति बशर अल–असदको विरोधमा उत्रिएका विद्रोही समूहले राजधानी दमास्कसलाई नियन्त्रणमा लिएको हो।

राजधानीलाई नियन्त्रणमा लिएपछि उनीहरूले सरकारी टेलिभिजन र रेडियामार्फत सन्देश जारी गरेको छ। विद्रोही समूहले राष्ट्रपति असदको शासन अन्त्य भएको दाबी गरेका छन्।

‘हामीले राष्ट्रपति बशर अल–असदको शासन अन्त्य गरिदिएका छौँ,’ सन्देशमार्फत विद्रोही समूहले भनेको छ।

विद्रोही समूहले राजनैतिक बन्दीहरूलाई चाँडै जेलबाट रिहा गरिने उनीहरूले बताएका छन्।

हयात तहरीर अल–शाम (एचटीएएस) नेतृत्वको विद्रोही समूहले बशर अल–असदले देश छोडिसकेको दाबी गरेको छ। देश छोडेको भनिए पनि उनी कहाँ छन् भन्ने पुष्टि हुन सकेको छैन।

असद संयुक्त अरब एमिरेट्स (यूएई) मा हुन सक्ने अनुमान गरिएको छ। उनले यूएईसँग शरण माग्न सक्ने बताइएको छ।

यूएईका राजनीतिक सल्लाहकार अनवर गरगशले भने सिरियाका राष्ट्रपति कहाँ छन् भन्ने विषयमा आफूहरूलाई जानकारी नभएको बताएका छन्।

बहराईनमा रहेका उनले पत्रकारहरूसँग कुरा गर्दै यस्तो बताएका हुन्। गरगशले सिरिया खतरामुक्त नभएको र आतंकवादीको जोखिम मडराई रहेको जिकिर गरेका छन्।

यसैबीच सिरियाका प्रधानमन्त्री गाजी अल–जलालीले सामाजिक सञ्जालमार्फत सन्देश जारी गरेर भनेका छन्,‘सिरिया छिमेकी र विश्वका अन्य मुलुकसँग राम्रो सम्बन्ध राख्नसक्ने देश बन्न सक्छ।’

आफू दामिस्कसमै रहेको र आम नागरिकको हितका लागि काम गर्न तयार रहेको उनले बताएका छन्। विद्रोही समूहले पनि सार्वजनिक संस्थानको नेतृत्व प्रधानमन्त्रीले सम्हाल्ने बताएको छ।

शनिबार सिरियाको तेस्रो ठूलो सहर होम्समाथि कब्जा गरेको विद्रोही समूहले आइतबार सिरियाको राजधानी दमास्कसमाथि कब्जा गरेको र असद सरकार अन्त्य भएको दाबी गरेका छन्।

विद्रोही समूहले राजधानीलाई नियन्त्रणमा लिएपछि त्यहाँका स्थानीयवासीले खुसी देखिएका छन्। विद्रोही समूह दामिस्कस पुगेपछि स्थानीयवासीले खसी मनाएका हुन्।

सिरियाको पछिल्लो राजनीतिक घटनाक्रममाथि अमेरिकी राष्ट्रपति जो बाइडेनले चासो व्यक्त गरेको ह्वाइट हाउसले बताएको छ।

प्रकाशित: २३ मंसिर २०८१ १५:२०

प्रतिक्रिया

Leave a Reply

Your email address will not be published. Required fields are marked *

3 × four =


© Nepali horoscope

© Gold Price Nepal

© Nepal Exchange Rates
© Nepal weather forecast