हिमाल प्रेस 
काठमाडौँ- स्पेनिस ला लिगामा रियल म्याड्रिडले जिरोनामाथि सानदार जित निकालेको छ।
रियलले घरेलु टोली जिरोनामाथि ३-० गोलको सहज जित निकालेपछि शीर्षमा रहेको बार्सिलोनासँग दूरी घटाएको छ। रियलको जितमा जुड बेलिङहम, आरदा गुलर र केलियन एमबाप्पेले गोल गरे।
पहिलो हाफको बेलिङहमको गोलबाट अग्रता लिएको रियलले दोस्रो हाफमा गुलर र एमबाप्पेको गोलबाट जित सुनिश्चित गर्यो।
जिरोनामा शनिबार राति भएको खेलमा घरेलु टोलीविरुद्ध सुरुवातमा संघर्ष गर्नु परेपनि रियलले ३६औं मिनेटमा बेलिङहमको गोलबाट पहिलो हाफमा १-० को अग्रता लिन सफल भयो। ब्राहिम डियाजको कटब्याक पास ब्लक भएपनि डि बक्स भित्रै क्लियर हुन नसकेको बललाई बेलिङहमले जाली चुमाए।
५५औं मिनेटमा टर्किस युवा प्रतिभा आरदा गुलरले गोल गर्दै रियलको अग्रता दोब्बर पारे। बेलिङहमको पासलाई उनले अफसाइड बिट ट्याप गर्दै गोल गर्न सफल भए। त्यसको एक मिनेटपछि नै एमबाप्पेले गोल गर्दै रियललाई ३-० को अग्रता दिलाए। यसै सिजन रियल आएका एमबाप्पेको यो रियलका लागि १०औं गोल हो। त्यसपछि थप गोल निस्कन नसक्दा रियलले महत्वपुर्ण ३ अंक बटुल्न सफल भयो।
जिरोनामाथिको सहज जितसँगै रियलले शीर्षस्थानको बार्सिलोनासँगको अंक दुरी २ मा छोट्याएको छ। रियलले अझै एक खेल कम खेलेको छ।
बार्सिलोनाको बराबरी
यता शीर्षस्थानमा रहेको बार्सिलोना स्पेनिस ला लिगामा बराबरीमा रोकिएको छ।
बार्सिलोनाले घरेलु टोली रियल बेटिससँग २-२ को बराबरी खेल्दै अंक बाड्न बाध्य बनेको हो। स्टेडियो बेनिटो भिल्लामरिन सेभिल्लामा शनिबार राति भएको खेलमा बार्सिलोनाका रोबर्ट लेवान्डोस्की र फेरान टोरेसले गोल गर्दा रियल बेटिसका जियोभानी लो सेल्सो र एसानी डिआओले बराबरी गोल फर्काए।
३९औं मिनेटमा जुल्स कुन्डेको पासमा लेवान्डोस्कीले गोल गर्दै बार्सिलोनालाई पहिलो हाफमा १-० को अग्रता दिलाए। ६६औं रेफ्रीको निर्णयमा असन्तुष्टि जनाएपछि बार्सिलोनाका प्रशिक्षक हान्सी डाएर फ्लिक रातो कार्ड खाँदै टच लाइन छाड्न बाध्य बने।
त्यसपछि ६८औं मिनेटमा जियोभानी लो सेल्सोले गोल गर्दै खेललाई १-१ गोलको बराबरीमा ल्याए। ८२औं मिनेटमा परिवर्तित खेलाडी फेरान टोरेसले गोल गर्दै बार्सिलोनालाई खेलमा पुनः २-१ को अग्रता दिलाए । ६०औं मिनेटमा राफिन्हाको स्थानमा मैदान छिरेका टोरेसले लामिन यमलको चलाखीपूर्ण पासमा गोल गर्न सफल भएका थिए।
रियल बेटिसले अफसाइडको अपिल गरेपनि रेफ्रीले भिडियो असिस्टेन्ट रेफ्री (भीएआर) को सहायता लिदै गोललाई मान्यता दिएको थियो।
रियल बेटिसले पनि परिवर्तित खेलाडीकै गोलको मद्दतमा खेललाई २-२ गोलको बराबरीमा ल्याए । बार्सिलोनाकै पूर्व खेलाडी भिक्टर रोकीको स्थानमा मैदान छिरेका एसानीले इन्ज्युरी समयको थप गरिएको चौथो मिनेटमा एइटर रुइवलको क्रसलाई डि बक्स भित्रबाट वान टचमा सुन्दर फिनिस गर्दै बार्सिलोनाबाट अंक खोस्न सफल भए ।
यो बराबरीसँगै बार्सिलोनाले आफ्नो शीर्षतालाई थप मजबुत बनाउने मौका गुमाएको छ। शीर्षस्थानमा रहेको बार्सिलोनाको १७ खेलबाट १२ जित, २ बराबरी र ३ हारसहित ३८ अंक पुगेको छ बार्सिलोना एक खेल कम खेलेको रियल म्याड्रिडभन्दा २ अंकले अघि छ ।
अब रियलले आफ्नो अर्को खेल जितेको खण्डमा बार्सिलोनाले शीर्षस्थान गुमाउनेछ। रियल बेटिस १६ खेलबाट २१ अंक जोडेर ११औं स्थानमा छ।
