हिमाल प्रेस 
विराटनगर विमानस्थलमा शुक्रबार सञ्चारकर्मीसँग कुरा गर्दै कांग्रेस सभापति शेरबहादुर देउवा। तस्बिर सौजन्य : देउवाको सचिवालय
विराटनगर- नेपाली कांग्रेसका सभापति शेरबहादुर देउवाले संविधान संशोधन प्रक्रिया चाँडै सुरु हुने बताएका छन्। विराटनगर विमानस्थलमा शुक्रबार सञ्चारकर्मीसँग कुरा गर्दै सभापति देउवाले संसद्मा दुईतिहाई पुग्ने गरी छलफलपछि संविधान संशोधनको प्रक्रिया सुरु गर्ने बताएका हुन्।
अहिलेको संसदीय प्रणाली नै उपयुक्त भएको र उपराष्ट्रपति भूमिकाविहीन भएकाले राष्ट्रियसभाको अध्यक्ष बनाउने गरी संविधान संशोधन हुनुपर्ने देउवाले बताए। सभापति देउवाले प्रधानमन्त्रीको चीन भ्रमणका क्रममा ऋण नलिने सम्झौता गरेको भन्दै ओलीलाई धन्यवाद दिए। उनले दुईदलीय वर्तमान सरकारबाट जनता खुसी रहेको धारणा राखे।
महामन्त्री गगन थापालाई उत्तराधिकारी बनाउन लाग्नुभएको भन्ने प्रश्नमा देउवाले पार्टीको आगामी महाधिवेशन तोकिएको समयमा नै हुने बताउँदै उत्तराधिकारी आफूले घोषणा गरेर मात्र नहुने स्पष्ट पारे। सभापति देउवा शनिबार कांग्रेस कोशी प्रदेशको पहिलो उद्घाटनका लागि विराटनगर आएका हुन्।
