हिमाल प्रेस 
बङ्गुरपालन। फाइल तस्बिर।
ललितपुर- बंगुरमा अफ्रिकन ‘स्वाइन फिभर’ को संक्रमण देखिएपछि दुई सय बढी बंगुर मरेका छन्। ‘स्वाइन फिभर’ संक्रमणका कारण खोरमा रहेका बंगुर धमाधम मर्न थालेपछि किसानमा चिन्ता बढेको हो।
जिल्ला पशुसेवा कार्यलय ललितपुरले खोरमा रहेका बंगुर मर्न थालेपछि परीक्षण गर्दा अफ्रिकन ‘स्वाइन फिभर’ को संक्रमण देखिएको जनाएको छ।
महानगरपालिका पशुसेवा विभागले बंगुर मर्न थालेपछि केन्द्रीय पशुरोग अन्वेषण प्रयोगशाला त्रिपुरेश्वरमा गरेको पिसिआर परीक्षणको नतिजाअनुसार जिल्लाको नख्खु करिडोर छेउछाउमा किसानले पालेका बंगुरमा अफ्रिकन ‘स्वाइन फिभर’ देखा परेको हो।
कात्तिकको अन्तिम साता नख्खु खोल आसपासमा किसानले पालेका बंगुरमा रोग देखिएर मर्न थालेका बताउँदै अहिले पनि संक्रमण फैलिँदै गएको जिल्ला पशुसेवा कार्यालयका प्रमुख प्रभात न्यौपानेले जानकारी दिए।
उनले भने,‘रोग फैलिँदै गएको छ। अहिलेसम्मको तथ्यांकका आधारमा किसानका दुई सय भन्दाबढी बंगुर मरेका छन्। अहिले दक्षिणकालीमा संक्रमण बढी देखिएको।’
