हिमाल प्रेस 
काठमाडौँ- सिरहाको धनगढीमाई नगरपालिकाका तत्कालीन प्रमुख प्रशासकीय अधिकृत गोपालप्रसाद बगालेसहित पाँच जनाविरूद्ध भ्रष्टाचार मुद्दा दर्ता भएको छ
आकस्मिक स्वास्थ्य सेवाका औषधि खरिदमा अनियमितता गरेको भन्दै अख्तियारले बिहीबार बगालेसहित पाँच जनाविरूद्ध विशेष अदालत काठमाडौँमा मुद्दा दायर गरेको हो।
तत्कालीन प्रमुख प्रशासकीय अधिकृत बगालेसहित नगरपालिकाका लेखा अधिकृत पुरुषोत्तमकुमार प्रसाद, नगरपालिकाका तत्कालीन स्वास्थ्य शाखा प्रमुख सुरैत चौधरी, तत्कालीन जिन्सी शाखा प्रमुख सम्पैत यादव र हेल्पिङ मल्टिपर्पोज प्रालि मैतिदेवी काठमाडौँ र उक्त फर्मका प्रबन्ध निर्देशक माधवप्रसाद गौतमविरूद्ध मुद्दा भ्रष्टाचार मुद्दा दर्ता भएको अख्तियारले जनाएको छ।
नेपाल सरकारको सःशर्त अनुदान शीर्षकबाट विनियोजित रकममध्ये १७ प्रकारका औषधिहरू जनसवाल पत्रिकामा प्रकाशित मूल्यभन्दा बढी मूल्य राखी खरिद गरे/गराएको र पाँच प्रकारका औषधिहरू पत्रिकामा प्रकाशित मूल्यसूचीभन्दा बाहिरको औषधि खरिद गरेको पाइएको अख्तियारको अनुसन्धानबाट खुलेको छ।
मुद्दा दायर भएका पाँचै जनामाथि जनही ४ लाख ६० हजार ८१० रूपैयाँ मागदाबी लिइएको अख्तियारले जनाएको छ।
