हिमाल प्रेस 
लुम्बिनी- उपप्रधान तथा अर्थमन्त्री विष्णुप्रसाद पौडेलले सरकार फेर्ने असम्भव प्रयासमा नलाग्न आग्रह गरेका छन्। उनले २०७९ सालको जनमत अनुसार सबैभन्दा बलियो कांग्रेस-एमालेको वर्तमान सरकार बनेको बताउदै पूरा कार्यकाल यही गठबन्धन जाने बताए।
रूपन्देही उद्योग संघको ४७ औं स्थापना दिवस तथा पुरस्कार वितरण कार्यक्रमलाई शनिबार बुटवलमा सम्बोधन गर्दै अर्थमन्त्री पौडेलले पर्दा पछाडि बसेर सरकार फेर्ने कोसिस नगर्न चेतावनी दिए।
प्रधानमन्त्री केपी शर्मा ओलीको चीन भ्रमणका सन्दर्भलाई लिएर कतिपयले गठबन्धनका विषयमा आशंका गरिएको तर्फ संकेत गर्दै उपप्रधानमन्त्री पौडेलले यो सरकार परिवर्तन नहुने स्पष्ट पारेका हुन्। ‘यो सरकार फेर्ने असम्भव भ्रममा नलाग्न र भ्रमको खेतीमा नरमाउनुस्।’ उनले भने, ‘यो सरकार बनेको हो, पूर्ण काल चल्छ, एमाले-कांग्रेस यसमा प्रतिवद्व छन्, यो सरकार पनि परिवर्तन हुन्छ र गर्न सकिन्छ भन्नेमा भ्रममा कोही नपरे हुन्छ यो चेतावनीका साथ भन्न चाहन्छु।’
उपप्रधानमन्त्री पौडेलले अहिलेको प्रतिनिधि सभाबाट बन्ने सबैभन्दा बलियो सरकार यही रहेको स्थिरताको लागि अन्य विकल्प नभएको बताए। उनले देशको अर्थतन्त्र सुधार गर्न सरकारले विशेष अभियान थालेको केही सुधार पनि आइसकेको जनाए।
अर्थमन्त्री पौडेलले अस्थिर सरकारकै कारण देशमा आर्थिक समस्या बढ्दै गएको प्रष्ट पारे। उनले निजी क्षेत्रको सहकार्यमा सरकार अघि बढ्ने बताउँदै उद्योग क्षेत्रका समाधान गर्नेगरी सरकार अघि बढेको बताए।
कार्यक्रममा नेपाल उद्योग परिसंघका अध्यक्ष विरेन्द्रराज पाण्डेले औधोगिक नीति र स्थिर सरकार नहुँदा समस्या परिरहेको बताउँदै सरकारले विशेष ध्यान दिन आग्रह गरे। लुम्बिनीका पूर्व मुख्यमन्त्री लीला गिरीले देशको अर्थतन्त्र बलियो बनाउन निजी क्षेत्रको साथ चाहिने बताउँदै उत्पादनमुखी र निर्यातमुखी उत्पादनमा विशेष ध्यान दिन सुझाव राखे।
रूपन्देही उद्योग संघका अध्यक्ष दिलिप सापकोटाले अहिले सबै उद्योगले ४० प्रतिशत पनि उत्पादन गर्न नसकेकाले त्यसको अवस्था सुधार्न कार्यान्वयनमुखी उद्योग नीति ल्याउन सरकारलाई आग्रह गरेका थिए। कार्यक्रममा नेपाल पत्रकार महासंघ रूपन्देहीसंगको सहकार्यमा स्थापित ४७ हजार राशीको उत्कृष्ट औधोगिक पत्रकारिता पुरस्कारबाट पत्रकार दिनेश पाण्डे पुरस्कृत भएका छन्।
