हिमाल प्रेस 
काठमाडौँ- फिल्म ‘कार्साङ्’ मा अभिनेता जितु नेपालको क्यारेक्टर लुक्स सार्वजनिक भएकाे छ। फिल्मका लेखक तथा निर्देशक यम शेर्पाले फेसबुकमा उनको क्यारेक्टर लुक्ससहितकाे पोस्टर सेयर गर्दै जितुको अहिलेसम्मकै फरक अभिनय रहेको बताएका छन्।
फिल्मको मुख्य भूमिकामा रहेको जानकारी दिँदै निर्देशक शेर्पाले जितुको अभिनयले दर्शकलाई हाँसोसहित रुवाउन सक्ने दाबी गरेका छन्। उनले लेखेका छन् ‘जितु नेपालको अहिलेसम्मकै फरक प्रस्तुति र अभिनयले तपाइँलाई हसाइ हसाइ रुवाइदिने छ।’
अभिनेता जितु नेपाल फिल्म ‘ज्वाइँ साब’ पछि अभिनेता ‘कार्साङ्’मा देखिँदैछन्। यसअघि निर्माण टिमले अभिनेता दयाहाङ राईको क्यारेक्टर पोस्टर सार्वजनिक गरेको थियो।
फिल्म आगामी पुस २६ मा प्रदर्शन हुनेछ। सामाजिक कथावस्तुमा बनेको फिल्ममा दयाहाङ राई, सिर्जना निङ्लेखु, जितु नेपाल, दिया मास्के, बुद्धि तामाङ, प्रेम लोप्चन, डोमा ह्योल्मो, सृष्टि गौतम, छोकी शेर्पा, सुरवीर पण्डित, कर्मा शेर्पालगायत कलाकारको अभिनय छ। मुख्य कलाकार सिर्जनाले यही फिल्मबाट डेब्यु गरेकी हुन्।
फिल्म सिन्धुपाल्चोक जिल्लाको बाह्रबिसे नगरपालिका, भोटेकोसी गाउँपालिका क्षेत्रमा छायांकन गरिएको छ। यार्सा फिल्म्स र पुरुषोत्तम प्रधान फिल्म्सको प्रस्तुति रहेको फिल्मका निर्माता छायाँकार पुरुषोत्तम प्रधान हुन्। फिल्म प्रधानले नै छायांकन गरेका छन्।
