काठमाडौँ– चाडपर्वको लामो बिदा फिल्म निर्माताका लागि एउटा अवसर हो। यस अवसरमा हलमा फिल्म प्रदर्शन गर्न उनीहरूको होडबाजी चल्छ। यस वर्ष पनि दसैँमा ‘बेहुली फ्रम मेघौली’, ‘१२ गाउँ’, ‘छक्का पञ्जा ५’ र ‘ज्वाइँ साब’ प्रदर्शन भयो।
तिहारमा नेपालीमा फिल्म ‘पूर्ण बहादुरको सारङ्गी’ एकल प्रदर्शनमा भयो। पाँचओटै फिल्ममध्ये ‘पूर्ण बहादुरको सारङ्गी’, ‘१२ गाउँ’ र ‘छक्का पञ्जा ५’ हलमा चलिरहेको छ। तीनओटै फिल्मलाई क्यूएफएक्स सिनेमाजले हलको बक्स अफिस रिपोर्टअनुसार सुपरहिटको ट्याग दिएको छ। हलमा पनि फिल्म हेर्ने दर्शकको भीड लागेका सञ्चालकहरुको भनाइ छ।
यी त भए हलमा चलिरहेका फिल्मको प्रसंग। हलमा जस्तै निर्माताहरुले चाडपर्वमा डिजिटल माध्यमबाट पनि फिल्म सार्वजनिक गरिरहेका हुन्छन्।
ती युट्युबमा निःशुल्क हेर्न पाइन्छ भने ओटीटीमा पैसा तिर्नुपर्ने हुन्छ। यसको असर नेपालमा डिजिटल प्लेटफर्मअन्तर्गत ओटीटीको विस्तार त्यति हुन नसकेको निर्माताहरूले बताउँदै आएका छन्।
अब हेरौँ यसवर्ष दसैँ तिहार चाडपर्व लक्षित युट्युबमा सार्वजनिक भएका फिल्म।
असोज र कात्तिकमा गरी बुढासुब्बा डिजिटल, हाइलाइट्स नेपाल, ओएसआर डिजिटल, केन्द्र मोसन पिक्चर्स, हाइटेक इन्टरटेनमेन्ट, बाँसुरी फिल्म्सलगायतका युट्युब च्यानलबाट एक दर्जनभन्दा बढी फिल्म सार्वजनिक भए। गतवर्ष १०० दिन मनाउन ब्लकबस्टर भएका फिल्मदेखि गत भदौमा प्रदर्शन भएको पूजा शर्माको ‘दान्भी’सम्म युट्युबमा हेर्न पाइन्छ।
नांगो गाउँ
गत वर्ष हलबाट चर्चा कमाएको फिल्म ‘नांगो गाउँ’ तीजको अवसरमा गत भदौ २१ मा बुढासुब्बा डिजिटलबाट सार्वजनिक भयो। दीपेन्द्र लामाको लेखन तथा निर्देशनमा बनेको फिल्ममा विद्यालयमा हुने राजनीति र सामान्य मान्छे कसरी राजनीतिमा आउन बाध्य हुन्छ भन्ने देखाइएको छ।
कलाकार दयाहाङ राई र शिशिर वाङ्देलको चुनावी प्रतिस्पर्धा फिल्मको मुख्य विषयवस्तु हो। युट्युबमा पनि दर्शकले फिल्म रुचाएका छन्। निर्माण टिमका अनुसार हलमा चार करोड ९० लाख कलेक्सन गरेको फिल्मले युट्युबमा पनि दुई करोड भ्युज बटुलिसकेको छ।
जारी
गत वर्ष सर्वाधिक कमाउने पहिलो फिल्म बनेको ‘जारी’ यस वर्ष दसैँको अवसरमा युट्युबमा सार्वजनिक भयो। हलमा १०० दिन मनाउन सफल फिल्मले चलचित्र विकास बोर्डको विवरणअनुसार हलमा १७ करोड ग्रस कलेक्सन गरेको थियो। युट्युबमार्फत पनि फिल्मले १ करोड २६ लाख भ्युज बटुलिसकेको छ।
कवि उपेन्द्र सुब्बाको डेब्यु निर्देशनमा बनेको फिल्ममा मिरुना मगर र दयाहाङ राई मुख्य भूमिका छ। लिम्बु समुदायको जारी प्रथामा आधारित फिल्म सामाजिक कथामा बनेको छ।
मनसँग मन
घटस्थापनाको दिन अर्थात् असोज १७ गते युट्युबमा फिल्म ‘मनसँग मन’ सार्वजनिक भयो। प्रेमकथामा बनेको फिल्ममा आपराधिक क्रियाकलापमा संलग्न नाइकेलाई पक्राउ गर्ने अभियानमा आधारित छ। फिल्ममा पुष्प खड्का र वर्षा शिवाकोटीको मुख्य भूमिका छ।
युट्युबमा साढे २३ लाख दर्शकले फिल्म हेरिसकेका छन्। २०७९ सालमा हलमा प्रदर्शन भएको फिल्मले ४९ लाख ६५ हजार ग्रस कलेक्सन गरेको थियो।
सम्झना बिर्सना
पूजा शर्मा र आकाश श्रेष्ठको मुख्य भूमिकामा बनेको फिल्म ‘सम्झना बिर्सना’ गत कात्तिक ९ मा युट्युबमा सार्वजनिक भयो। फिल्ममा उनीहरुकै प्रेमकथामा आधारित छ। फिल्मका लेखक तथा निर्देशक निमेष प्रधान हुन्।
यो फिल्म पनि २०७९ सालमा नै प्रदर्शन भएको थियो। चलचित्र विकास बोर्डको विवरण हलमा फिल्मले २१ लाख ३४ हजार ग्रस कलेक्सन गरेको थियो। भने युट्युबमा करिब १६ लाख भ्युज बटुल्न सफल भएको छ। फिल्म बुढा सुब्बा डिजिटल युट्युबमार्फत सार्वजनिक गरिएको हो।
महापुरुष
कात्तिक १५ लक्ष्मीपूजाको दिन फिल्म ‘महापुरुष’ सार्वजनिक भयो। फिल्मका निर्देशक प्रदीप भट्टराई हुन्। फिल्ममा सन्तान बिदेसिएपछि घरमा एक्लो भएका पिताको कथामा आधारित छ।
पिताको भूमिकामा वरिष्ठ कलाकार हरिवंश आचार्य छन्। अन्य कलाकार मदनकृष्ण श्रेष्ठ, गौरी मल्ल, अरुण क्षेत्री, अञ्जना बराइली, रवीन्द्रसिंह बानियाँलगायतको अभिनय छ। फिल्म केन्द्र मोसन पिक्र्चस नामक युट्युब च्यानलबाट सार्वजनिक गरिएको हो। यो फिल्म २०७९ सालमा प्रदर्शन भएको थियो। हलमै ५१ दिन मनाउन सफल फिल्मले सात करोड ३८ लाख कमाएको चलचित्र विकास बोर्डको विवरणमा उल्लेख छ। युट्युबमा हालसम्म फिल्मले १९ लाख भ्युज बटुलेको छ।
हिँड्दा हिँड्दै
असोज २४ अर्थात् फूलपातीको दिन फिल्म ‘हिँड्दा हिँड्दै’ सार्वजनिक भयो। प्रेम कथामा आधारित फिल्ममा मित्रता र प्रेम सम्बन्धमा आउने उतारचढावलाई प्रस्तुत गरिएको छ। फिल्ममा अभिनेता आकाश श्रेष्ठ, सलोन बस्नेत र अभिनेत्री रेखा शाहको मुख्य भूमिका छ। मिलन आलेमगरको निर्देशनमा बनेको फिल्मको कथा सुशील पंगेनीले लेखेका हुन्।
२०८० सालमा प्रदर्शन भएको फिल्मले हलमा दर्शक तान्न असफल भयो। युट्युबमा भने १६ लाख दर्शकले फिल्म हेरिसकेका छन्।
दान्भी
असार ७ मा प्रदर्शन भएको फिल्म ‘दान्भी’ हलमा नचलेपछि तिहारलक्षित गरेर निर्माण टिमले युट्युबमा सार्वजनिक गरे। पूजा शर्माको पहिलो एक्सन फिल्मको भनेर चर्चा गरिएको थियो। तर प्रदर्शन पछि फिल्मले हलमा दर्शक तान्न सकेन। युट्युबमा भने साढे १३ लाख दर्शकले हेरेका छन्।
यो फिल्मबाट अभिनेताका रुपमा कुन्साङ बम्जनले नेपाली सिने जगतमा डेब्युसमेत गरेका छन्। रूपेश तामाङको निर्देशनमा बनेको फिल्म प्रेमकथामा आधारित छ।
सोल अफ द कमान्डो
गोरखा सैनिकको जीवनकथा समेटिएको फिल्म ‘सोल आफ द कमान्डो’ कात्तिक २ मा ओएसआर डिजिटलबाट सार्वजनिक भयो। फिल्मका निर्देशक युवराज राई (वीरबहादुर) हुन्। फिल्ममा राजकुमार राई, कमला खापुङ्ग लिम्बु, शिशिर वाङ्देल, नरेन खड्कालगायत कलाकारको अभिनय छ।
२०७९ सालमा प्रदर्शन भएको फिल्मले चलचित्र विकास बोर्डको विवरणअनुसार हलमा दुई लाख ४३ हजार ग्रस कलेक्सन गरेको थियो। युट्युबमा भने पाँच लाख १६ हजार दर्शकले हेरिसकेका छन्।
पर्खी बसेँ
असोज १७ अर्थात् घटस्थापनाकै दिन अर्को फिल्म ‘पर्खी बसेँ तिमीलाई’ सार्वजनिक भयो। यही फिल्मबाट किरण श्रेष्ठ र रक्षा बुढाथोकीले नेपाली फिल्म जगतमा डेब्यु गरे। प्रेम कथामा आधारित ‘पर्खि बसेँ’ को सिक्वेल हो। पहिलो भाग चलेपछि नयाँ कलाकारसहित निर्माण टिमले गतवर्ष दोस्रो भाग प्रदर्शन गरे। तर फिल्म हलमा चलेन। युट्युबमा फिल्मलाई करिब ६ लाख दर्शकले रुचाएका छन्। फिल्मका निर्देशक दीपक श्रेष्ठ हुन्।
म
सुवर्ण थापाको निर्देशनमा बनेको फिल्म ‘म’ गत असोज ११ मा युट्युबमा सार्वजनिक भयो। फिल्ममा डिप्रेसनका कारण आत्महत्या गर्न बाध्य युवापुस्ताको कथा समेटिएको छ।
फिल्ममा निराजन प्रधान, निशा अधिकारी, रुविना थापा, नरेन खड्का, सरोज खनाल, सरिता लामिछाने, सलोन बस्नेतलगायत कलाकारको अभिनय छ।
२०७९ सालमा प्रदर्शन भएको फिल्मले हलमा दुई लाख ग्रस कलेक्सन गरेको थियो भने युट्युबमा ४ लाख भ्युज बटुलेको छ।
अदृश्य
२०८० सालमा हलमा प्रदर्शन फिल्म ‘अदृश्य’ पनि युट्युबमा सार्वजनिक भएको छ। फिल्मका निर्देशक प्रह्लाद काफ्ले हुन्। राकेश रनपालको कथा रहेको फिल्ममा आकाश उखेडाको पटकथा तथा संवाद लेखन छ।
अपराधको कथामा बनेको फिल्ममा प्रमोद अग्रहरि, रिश्ता बस्नेत, शोहित मानन्धर, प्रवीण खतिवडा, छुल्ठिम गुरुङ, सन्दीपबाबु लोहनीलगायत कलाकारको अभिनय छ।
हलमा नचलेपनि फिल्म युट्युबमा साढे एक लाख दर्शकले हेरेका छन्। फिल्म घटस्थापनाको दिन असोज १७ मा हाइटेक इन्टरटेनमेन्ट युट्युब च्यानलबाट सार्वजनिक गरिएको हो।
यसबाहेक पनि आकाश मगरको निर्देशनमा बनेको फिल्म ‘जिग्री’, दीपक तामाङ लामाको निर्देशनमा बनेको ‘देउरालीमा लाएको माया’, रमेश कुमार राई निर्देशित ‘मेरो अदालत’लगायत फिल्म युट्यबमा हेर्न सकिन्छ।
