हिमाल प्रेस 
काठमाडौँ- चर्चित गायिका मेनुका पौडेलको स्वरमा ‘तेजस्वी अप्सरा’ बाेलको गीत सार्वजनिक भएको छ। मनोज खड्काको शब्द रहेको गीतमा कल्याण सिंहले संगीत भरेका छन्।
लिरिकल शैलीमा गीत रेकर्ड गर्दाको क्लिपहरुलाई समेटेर गीतको भिडियो तयार पारिएको छ। भिडियोमा गायिका मेनुका, गीतकार मनोज र संगीतकार कल्याणलाई देख्न सकिन्छ।
गीतकार खड्काले आत्मीय व्यक्ति गुमाउँदाको पीडालाई समेटेर ‘तेजस्वी अप्सरा’ लेखेको बताए। ‘यो गीत मेरा लागि शब्द र मेलोडी मात्र भन्दा पनि पिस अफ हार्ट हो। आमा गुमाउँदाको पीडालाई गीतमा उतार्न प्रयास गरेको छु। आफ्ना आत्मीयजन गुमाएका श्रोता दर्शकले यो गीतको थप गहिराई महसुस गर्न सक्नुहुन्छ’, उनले भने। उनले आफूले गीत लेख्दा पीडा र ऊर्जालाई सन्तुलनमा राख्ने प्रयास गरेको बताए।
गीतकार खड्का हाल अमेरिकी अन्तर्राष्ट्रिय सहयोग नियोग यूएसएडको मुख्यालय वासिङ्टन डीसीमा कार्यरत छन्। उनले बिशेषतः सम्बन्धका पाटा, प्रेरणाका स्रोत, वैदेशिक रोजगारजस्ता समाजका आयामलाई समेटेर गीत सार्वजनिक गरिरहेका छन्।
दर्जन हाराहारीमा गीत रेकर्ड गराइसकेका गीतकार खड्काको रामकृष्ण ढकालको स्वरमा रहेको ‘गाउँघरले सोध्यो परदेशीलाई’, र प्रमोद खरेल तथा डा. त्रिशला गुरुङको स्वरमा रहेको ‘तिमी जे बन उदाहरण बन’ चर्चित छ।
