विधिको शासन कायम गर्न सरकार पूर्ण रूपले लागि परेको छ : गृहमन्त्री

महेन्द्रनगर – गृहमन्त्री रमेश लेखकले विकासमा राजनिति गर्न नहुने बताएका छन्।

बुधबार कञ्चनपुरको कृष्णपुर नगरपालिकाले आयोजना गरेको स्वागत कार्यक्रममा बोल्दै गृहमन्त्री लेखकले कसैले पनि विकासमा राजनिति गर्न नहुने बताएका हुन्।

‘चुनाव लड्दा हामी आ–आफ्नो पार्टीको झण्डा लिएर जान्छौ, उने भने, ‘चुनाव जितिसकेपछि विकासको मुद्धामा सबै मिलेर अगाडी बढ्नुपर्छ।’

उनले लोकतन्त्रको विकल्प अरु कुनै व्यवस्था हुन नसक्ने बताए। ‘लोकतन्त्रमा जनताका अधिकारहरुको सुरक्षा गर्ने,स्वतन्त्रता प्रदान गर्ने जनताको व्यवस्था हो,’ उनले भने, ‘त्यसैले अहिलेको शासन व्यवस्थालाई हामीले सुदृढ गर्दै लग्नुपर्छ यसैमा जनताको विश्वास र भरोसा जगाउनु पर्छ ,त्यसका लागि पनि स्थानीय सरकारको सबैभन्दा भुमिका महत्वपूर्ण छ।’

उनले स्थानीय सरकारले सहजढंगले जनतालाई सेवा प्रदान गर्नुपर्ने बताए।

‘हाँसेर बोली दिनुस् आधा समस्याको समाधान त्यसबाटै भइहाल्छ,’ गृहमन्त्री लेखकले भने, ‘सेवा प्रदान गर्दाखेरी जनतालाइै सबैभन्दा माथी राखेर सेवा प्रदान गर्नुहोस्।’

उनले देशमा विधिको शासन कायम गर्न सरकार पूर्ण रुपले लागि परेको बताए। ‘एमाले र कांग्रेस मिलेर सरकार बनेको छ,’ उनले भने, ‘यो सरकार देशमा स्थिरता र सुशाशन कायम राख्नका लागि बनेको हो।’

उनले जनजीविकाको सवाल र मुलुकमा आर्थिक उन्नती गर्ने सवालमा सरकार क्रियाशिल भएर लागेको बताए। ‘एकै महिनामा परिणाम आउँदैन सरकारले गरेका कामको परिणाम आउन समय लाग्छ,’ उनले भने, ‘हामी अत्यन्तै मेहनतका साथ काम गरिराखेका छौँ।’

त्यसैगरी उनले पछिल्लो समय लागुऔषधका कारण दुर्घटना बढेको बताउँदै त्यसको नियन्त्रणका लागि पनि स्थानीय सरकार लाग्नु पर्ने बताए।